Azərbaycan, Bakı, 05 avqust / Trend , müxbir N. İsmayılova /
Paşa Sığorta şirkətinin Direktorlar Şurası cari ilin ilk 6 ayı üzrə şirkətin fəaliyyətinin əməliyyat və maliyyə nəticələrinin qiymətləndirilməsini başa çatdırıb, aparılmış təhlilin nəticəsi olaraq şirkətin İdarə Heyətinə ikinci yarımillik üçün biznesin inkişafının əsas parametrləri üzrə müvafiq tövsiyələr verilib. Bu barədə şirkətdən məlumat verilib.
"Şirkətin ilk yarımillik fəaliyyətinin nəticələrini korporativ fəlsəfənin həyata keçirilməsi istiqamətində təşkilatın səylərinin və onun bizim bazarın mövcud reallıqları ilə düzgün uyğunlaşmasının təmin edilməsinin təbii nəticəsi hesab etmək olar. İşlər üçillik biznes inkişaf planına tam uyğun şəkildə davam edir və yarımilliyin nəticələri 2009-cu il üzrə planın bütün komponentlərinin uğurla həyata keçirilməsi üçün kifayət qədər nikbinlik verir" - "Paşa Sığorta" ASC-nin İdarə Heyətinin sədri Nofəl Rzayev deyib.
Paşa Sığorta-nın birinci yarımillikdə sığorta gəlirlərinin ümumi həcmi 4 milyon manat təşkil edib ki, bu da keçən ilin 6 aylıq göstəricilərindən 35% artıqdır. Sığorta haqlarının əsas artım istiqamətləri avtomobil sığortası, inşaat-montaj sığortası və tibbi sığorta növlərinin payına düşür.
Paşa Sığorta-nın cəmi investisiya portfeli 12 milyon manata çatıb və birinci yarımillikdə investisiya fəaliyyətindən gələn gəlir 0.63 milyon manata bərabər olub, bu da öz növbəsində 2009-cu il üzrə planlaşdırılmış investisiya gəlirlərinin göstəricilərinə uyğun gəlir.
Paşa Sığorta-nın sığorta hadisələri üzrə birinci yarımillikdə həyata keçirdiyi ödənişlər 0,9 milyon manat təşkil edib. Sığorta hadisələri üzrə əsas ödəniş istiqamətləri avtomobil sığortası, tibbi sığorta, əmlak sığortası, həyat və bədbəxt hadisələrdən sığorta növləri olub.
Paşa Holdinq-in tərkibində fəaliyyət göstərən Paşa Sığorta korporativ və fərdi müştərilərə 30 sığorta növü üzrə xidmət göstərir. Kapitallaşma göstəricilərinə görə Paşa Sığorta 9 milyon manat nizamnamə kapitalı və 18,5 milyon manat cari məcmu aktivlə ölkənin aparıcı sığortaçılarının ilk beşliyinə daxildır. 2007-ci ildən Paşa Sığorta Şirkətinin idarəetmə sistemi ISO 9001: 2000 beynəlxalq idarəetmə standartı üzrə Britaniyanın Moody agentlyi tərəfindən sertifikatlaşdırılıb. 2009-cu ildən Paşa Sığorta insan haqlarının müdafiəsi, ətraf mühitin mühafizəsi və korrupsiya əleyhinə mübarizə üzrə BMT-nin Qlobal Saziş təşəbbüsünün (UN Global Compact Initiative) iştirakçısıdır.
Avqustun 5-nə olan rəsmi məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]
