Azərbaycan, Bakı, 17 avqust / Trend , müxbir E. İsmayılov /
Azərsun Holding şirkətlər qrupu 2010-cu ilin birinci, yaxud ikinci rübündə kağız tullantılarının təkrar emalı və kağız məhsullarının son istehsalı ilə məşğul olacaq kombinatı istifadəyə verməyi planlaşdırır. Bu barədə bazar ertəsi holdinqdəki mənbə deyib. Əvvəllər kombinatın bu ilin sonunda istifadəyə verilməsi planlaşdırılırdı.
Ölkənin kağıza olan tələbatının təmin etməklə yanaşı, müəssisə ətraf mühitin çirklənməsinin qarşısının alınmasında da vacib rol oynayacaq.
"Bu, çox böyük və əhəmiyyətli layihədir. Artıq yeni müasir avadanlıqlar gətirilib və hazırda müəssisədə montaj işləri aparılır. Gələn ilin birinci və ya ikinci rübündə işlərin yekunlaşdırılması gözlənilir", - mənbə deyib.
Onun sözlərinə görə, yeni kombinatın inşası böyük əhəmiyyət kəsb edir və müəssisədə son kağız məhsulu emal ediləcək tullantı qəbulu üzrə məntəqə də olacaq.
Yeni kombinatın inşasının 30 milyon avroya başa gələcəyi gözlənilir. Müəssisə Sumqayıtda, sənaye şəhərciyində yerləşəcək. Fabrik gündə 200 ton, ildə isə 60 min ton istifadə olunmuş kağız emal etməyə qadir olacaq.
Bu fabrikin işə başlaması ilə kağız sənayesi kompleks fəaliyyət göstərəcək. Hələ 1996-cı ildə holdinqin investisiyası vasitəsilə Xırdalanda karton fabriki yenidən qurulmuşdu.
Hazırda bir ton kağız istehsalı üçün 2,4 ton odun, 440 ton su, 7600 kilovat elektrik enerjisi tələb olunur. Bu mənbələrin maya dəyərinin bahalaşması kağız sənayesində də qiymətlərin qalxacağını proqnozlaşdırmağa əsas verir. Emal müəssisəsinin inşası yalnız qiymətlərin qalxmasından sığortalanmaq üçün şərait yaratmayacaq, həm də Azərbaycana ixrac potensialını qaldırmaqla regionda lider mövqeyini qorumağa imkan verəcək.
Kombinatın kağız tullantılarının təkrar emalı üzrə potensialı yalnız Azərbaycanın deyil, Gürcüstan, Türkmənistan və Dağıstanın da kağıza tələbatını təmin etməyə imkan yaradacaq. İstehsalın 30 faizinin hesabına ölkənin tələbatı ödəniləcək, 70 faizi isə qonşu ölkələrə ixrac olunacaq.
Azərsun Holding 1992-ci ildə yaradılıb. Holdingin fəaliyyət sahələri bunlardır: çay, bitki yağlarının emalı və qablaşdırılması, tiocarət və distribütorluq, inşaat, bank işləri, sığorta, karton-kağız istehsalı, ət və tərəvəz konservləri, yüklərin daşınması və saxlanılması və s.
Məqalə müəllifi ilə əlaqə ünvanı: [email protected]
