Azərbaycan, Bakı, 21 avqust / Trend , müxbir Ü.İsmayılova /
Azərbaycan hökuməti "donuz qripi" (A/H1N1) əleyhinə vaksin hazır olan kimi onu almaq niyyətindədir. Bu barədə cümə günü Azərbaycan Səhiyyə Nazirliyindən deyilib.
"Azərbaycan tərəfi onu yalnız tamamilə sınaqdan keçiriləndən sonra alacaq", - nazirlikdən deyilib.
"A/H1N1 virusu əleyhinə vaksin oktyabra qədər hazırlanacaq", - bir müddət əvvəl Ümumdünya Səhiyyə Təşkilatının rəhbəri, doktor Marqaret Çen deyib.
Onun sözlərinə görə, vaksinin hazırlanması üzərində iş yarım ildir ki, gedir və hazırda tibbi preparatın mümkün istehsalçıları ilə danışıqlar aparılır.
İyulda Azərbaycanda ilk dəfə olaraq, A/H1N1 virusu - "donuz qripi" nə yoluxma faktı aşkarlanıb. Azərbaycan Səhiyyə Nazirliyinin məlumatına görə, yoluxma faktı Bakı və Gəncə sakinində - iyulun 27-də Fransadan və iyulun 29-da Böyük Britaniyadan qayıdan şəxslərdə aşkarlanıb.
"Xəstələrlə kontaktda olan bütün şəxslər və hər iki reysin sərnişinləri də müayinədən keçiblər və nəticələr qənaətbəxş olub", - Səhiyyə Nazirliyindən deyilib.
Nazirlikdəki mənbədən həmçinin deyilib ki, hazırda nazirlikdə "donuz qripi"nə yoluxma faktı qeydə alınmayıb.
"İyulda xaricə səfərdən sonra yoluxan iki xəstə artıq tamamilə sağalıb və özlərini yaxşı hiss edirlər", - nazirlikdən deyilib.
A/H1N1 virusunun əsas simptomları bunlardır: yüksək temperatur, öskürək, boğaz ağrısı, zökəm, bədəndə ağrılar, baş ağrısı, üşütmə və halsızlıq. Virusa yoluxmuş insanların böyük əksəriyyətində həm də diareya və ürəkbulanma qeydə alınır.
Məqalə müəllifi ilə əlaqə ünvanı: [email protected]