Azərbaycan, Bakı, 22 avqust / Trend , müxbir E.İsmayılova /
Toyuq yumurtasının qiymətinin 0,07 manatdan 0,12 manata qədər bahalaşması qiymətlərin istehsalçılar tərəfindən artırılması ilə əlaqədar deyil. Bu barədə Azərbaycan Quşçuluq Cəmiyyətinin sədri Aydın Vəliyev şənbə günü bilidirib.
"Sahibkarlar toyuq yumurtasının qiymətini məlum olmayan səbəbdən bahalaşdırırlar", - Vəliyev deyib.
Onun sözlərinə görə, bu gün toyuq yumurtası və ət istehsalı üzrə müəssisələrdən heç biri qiymət artımı ilə bağlı məlumat verməyib.
Toyuq ətinin qiymətinin artmasının mümkünlüyü barədə danışarkən, Vəliyev deyib ki, hələ ki istehsalçılarda və bazarda toyuq ətinin bahalaşması müşahidə edilmir.
Dövlət Statistika Komitəsinin məlumatına görə, Azərbaycanda iyul ayında toyuq yumurtasının 1 ədədinin orta bazar qiyməti 0,09 manat, toyuq ətinin qiyməti isə 3,61 manat təşkil edib.
Respublika Quşçuluq Cəmiyyətinin tərkibinə 27 müəssisə daxildir. Onlardan 26-sı quşçuluq kombinatı, yalnız biri isə baytarlıq dərman preparatlarının distribüteridir. Quşçuluq sahəsində çalışanların sayı 15-20 min nəfər təşkil edir.
Avqustun 22-nə olan rəsmi məzənnə 0,804 AZN\USD təşkil edir.
Məqalənin müəllifi ilə əlaqə ünvanı: [email protected]
