Azərbaycan, Bakı, 27 avqust / Trend , müxbir Ü.İsmayılova /
"Azərbaycanın ERA və MBA Group konsaltinq şirkətləri ölkənin ipoteka bazarında tələb-təklifin öyrənilməsi üzrə pilot mərhələni başa çatdırıblar", - cümə axşamı MBA Group şirkətinin baş direktoru Nüsrət İbrahimov deyib.
Bazarın öyrənilməsi Beynəlxalq Maliyyə Korporasiyasının (BMK) Mərkəzi Asiya və Azərbaycanda ilkin ipoteka bazarının inkişafı üzrə layihəsi çərçivəsində həyata keçirlir.
"ERA şirkəti bazarda olan tələbatı, MBA Group şikəti isə təklifləri öyrənir", - İbrahimov deyib.
Onun sözlərinə əsasən, ipoteka bazarında təkliflərin sorğusu 30, tələbatın sorğusu isə 45 gün sürəcək.
"Hər iki şirkət sorğunun nəticələrini BMK-ya təqdim edəcək və zərurət yarandıqda bu istiqamətdə işlər davam etdiriləcək. Sorğu 100 nəfəri əhatə edəcək", - İbrahimov qeyd edib.
Layihə BMK tərəfindən İsvəçrənin İqtisadi Əlaqələr üzrə Dövlət Katibliyi ilə (State Secretariat for Economic Affairs - SECO) birgə maliyyələşdirilib. Layihənin regional xarakter daşımasına və Mərkəzi Asiya ilə Azərbaycanı əhatə etməsinə baxmayaraq, SECO-nun vəsaiti yalnız Azərbaycan üçün nəzərdə tutulub.
Məqalə müəllifi ilə əlaqə ünvanı: [email protected]