Azərbaycan, Bakı, 03 sentyabr / Trend , müxbir E.İsmayılov /
Azərbaycanda şəkər istehsal edən yeganə zavodun (İmişlidə yerləşir) sahibi Azersun Holding şirkətlər qrupu şəkərin bir tonunun qiymətini 4,5 faiz, bir kiloqramının qiymətini 1,4 faiz artırıb. Bu barədə cümə axşamı holdinqin ictimaiyyətlə əlaqələr və sosial xidmətlər departamentinin rəhbəri Kazım Babayev deyib.
"Ötən ilin dekabrından başlayaraq 2009-cu ilin avqustunadək bu məhsulun qiyməti dünya birjalarında (Nyu-York, Çikaqo, London) 104-105 faiz artıb. Bu da son 28 il ərzində rekord göstəricidir, - Babayev deyib. - Bu faktor yerli şəkər məhsullarını qiymətlərinə də təsir edib".
Babayevin dediyi kimi, şəkərin dünya qiymətlərinin artması bu məhsulun Hindistan, Çin, Braziliya kimi iri ixracatçılarının istehsalı azaltması ilə də əlaqədardır. Bu ölkələrdə şəkər xammalı istehsalının azalması əlverişsiz təbii şəraitdən (quraqlıq, leysan və s.) baş verir.
"Şəkərin qiymətinin belə əhəmiyyətli sıçrayışına baxmayaraq, qiymət artımının qarşısını almağa çalışırıq. Hələlik qiymətlər 4,5 faiz artıb və onlar ölkədə istehsal olunan xammal hesabına saxlanılır. Lakin menecmentlik baxımından bu elə də uzun davam etməyəcək. Zavodumuzun istehsalı olan şəkərin qiymətinin artımı pərakəndə satış çərçivəsində bir neçə qəpik təşkil edir", - Babayev deyib.
Onun sözlərinə görə, Azərbaycanda şəkər istehsalı üçün xammalın böyük hissəsi ölkəyə xaricdən gətirilir. İstehsalın müəyyən hissəsi ölkədə becərilən şəkər çuğundurunun emalı hesabına həyata keçirilir. 2006-cı ildən Azərsun fermerlərə müxtəlif cür kömək göstərməklə ölkədə şəkər çuğunduru yetişdirilməsinin inkişafında fəal iştirak edir.
Azərsunq Holding-dən deyilib ki, İmişli zavodunda istehsal olunan şəkər həm daxili bazarın təminatına yönəldilir, həm də Mərkəzi Asiya ölkələrinə ixrac edilir. Zavod üçün ən vacibi məhsullarının rəqabətədavamlı olmasıdır.
Hazırda İmişli zavodunda istehsal olunan məhsul Azərbaycanda şəkərə olan tələbatdan demək olar ki, iki dəfə artıqdır. Zavodda illik şəkər istehsalı 400-450 min tondur. Daxili bazarın illik tələbatı isə 230-250 min tondur.
İmişli zavodunun məhsulları Türkmənistan, Əfqanıstan, Gürcüstan, Ukrayna və İraqa ixrac edilir.
Azərsun Holding 1992-ci ildə yaradılıb. Holdingin fəaliyyət sahələri bunlardır: çayın, bitki yağlarının emalı və qablaşdırılması, ticarət və distribüterlik, inşaat, bank işləri, sığorta, karton-kağız istehsalı, ət və tərəvəz konservləri, yüklərin daşınması, saxlanması və s.-dir.
Məqalə müəllifi ilə əlaqə ünvanı: [email protected]
