Azərbaycan, Bakı, 09 sentyabr / Trend , müxbir Ü.İsmayılova /
Azərbaycan Respublikası Sahibkarlar Təşkilatları Milli Konfederasiyasının (STMK) nümayəndə heyəti Beynəlxalq İşəgötürənlər Təşkilatının (IOE) növbəti konfransında iştirak edəcək. Bu barədə STMK-nın prezidenti Məmməd Musayev çərşənbə günü deyib.
"Konfrans sentyabrın 10-11-də Riqada (Latviya) keçiriləcək", - Musayev deyib.
Onun sözlərinə görə, konfransın gedişində işəgötürənlərin hüquqlarının müdafiəsi məsələsi müzakirə ediləcək.
1920-ci ildə yaradılmış Beynəlxalq İşəgötürənlər Təşkilatı sosial əmək əlaqələrinin tənzimlənməsi sahəsində biznes maraqlarını təmsil edən yeganə şirkətdir. Hazırda IOE-nin üzvləri 132 ölkədən olan 136 milli işəgötürən təşkilatlarıdır. Təşkilatın mənzil-qərargahı Cenevrədə yerləşir.
IOE-nin əsas fəaliyyət istiqamətləri milli işəgötürənlər təşkilatlarının inkişafı və möhkəmlənməsi, beynəlxalq sosial əmək əlaqələrinin aktual problemləri üzrə analitik və mövqe materiallarının hazırlanması, yeni iş yerləri və müəssisələrin yaradılmasına dəstək, kiçik və orta biznesin inkişafıdır.
Məqalə müəllifi ilə əlaqə ünvanı: [email protected]
