Azərbaycan, Bakı, 23 sentyabr / Trend , müxbir İ.Xəlilova /
Asiya İnkişaf Bankı (AİB) yaxın günlərdə multitranş maliyyələşmə (MFF) çərçivəsində Göyçay və Naxçıvanda sanitar xidmətlərin və su təchizatı sistemlərinin təkmilləşdirilməsi layihəsi üzrə kredit müqaviləsini imzalanması üçün Azərbaycan hökumətinə təqdim etməyi planlaşdırır. Müqavilə çərşənbə günü bankın Direktorlar Şurasında 600 milyon dollar həcmi ilə bəyənilib. Bu barədə çərşənbə günü bankın Bakı nümayəndəliyindən bildirilib.
"MFF çərçivəsində ilk tranş 75 milyon dollar həcmində təsdiqlənib, bu vəsait iki rayonda işlərin maliyyələşdirilməsi üçün nəzərdə tutulub, lakin layihə üç rayonu əhatə etməli idi. 25 milyon dollar - hökumətin iştirak payı da nəzər alınsa, bu vəsait iki rayonda bütün işlərin görülməsi üçün kifayətdir, onların siyahısının genişləndirilməsi məbləği böyük olan növbəti tranş çərçivəsində mümkün olacaq ", - nümayəndəlikdən bildirilib.
Birinci tranşın alınması 2009-cu ilin sonunda - növbəti ilin əvvəlində mümkün olacaq.
Kredit müqaviləsinə əsasən, birinci tranş AİB-in kredit resurslarından ayrılır: dörd il güzəştli olmaqla 24 il müddətinə, illik libor+0,2 faiz dərəcəsi ilə verilir.
Birinci tranşın vəsaiti beş il öncə təsdiqlənmiş Ağdaş, Göyçay və Naxçıvanda sanitar xidmətlər və su təchizatı sisteminin təkmilləşdirilməsi layihəsi ilə əlaqədar əlavə xərclərin ödənilməsi üçün nəzərdə tutulub. Bu layihənin dizaynı 2004-cü ildə hazırlanıb, bu dövr ərzində isə tikinti materiallarının, əsasən də kanalizasiya hissəslərinin qiyməti artıb, xərclərin artması müşahidə olunur. Azərbaycan tərəfinin təklif etdiyi layihənin əhatə etdiyi rayonlarda kanalizasiya sistemlərində müasir qurğuların quraşdırılması onun qiymətinə təsir edir. AİB layihəsində seçilmiş rayonlarda su təchizatının və kanalizasiya sistemlərinin tamamilə bərpası nəzərdə tutulur.
Layihənin ilkin dəyəri 39,9 milyon dollar təşkil edir. Layihənin maliyyələşdirilməsi üçün Asiya Bankı ilkin olaraq 30 milyon dollar ayırıb, 9,9 milyon dollar isə hökumətin payına düşüb.
Multitranş maliyyələşdirmə su təchizatı və kanalizasiya sahəsində islahatlar proqramı və aydın strategiya ilə dəstəklənən investisiyaları nəzərə alaraq AİB ilə ölkə hökuməti arasında səkkiz illik əməkdaşlıq üçün əsas olacaq.
İkinci tranş bu layihənin əhatə dairəsinin genişləndirilməsinə və dörd şəhəri - Ağdaş, Ağcabədi, Beyləqan və Balakən şəhərlərini əhatə etmək üçün nəzərdə tutulub.
Üçüncü tranş Bakı ətrafında mərkəzləşdirilmiş su təchizatı və kanalizasiya sisteminin yaranması üçün ayrılacaq.
"Azərsu" SC-nin su layihəsi üzrə məsləhətçisi AICO Consulting Ltd/European Consultans Organization konsorsiumudur.
Məqalə müəllifi ilə əlaqə ünvanı: [email protected]
