Azərbaycan, Bakı, 13 oktyabr / Trend , müxbir N.İsmayılova/
Sentyabrda Azərbaycanın ilk regional bankı - Ganja Bank ölkənin Mərkəzi Bankı yanında fəaliyyət göstərən Azərbaycan İpoteka Fondunun xəttilə beş ipoteka krediti verib, çərşənbə axşamı bankdan deyiblər.
Sentyabrda bank 122.3 min manat həcmində beş ipoteka krediti verib. Onlardan ümumi məbləği 67 950 manat təşkil edən üç kredit güzəştli şərtlərlə verilib.
İpoteka Fondu tərəfindən banka ayrılan ilkin məbləğ 500 min manat təşkil edib.
Ganja Bank ipoteka kreditlərinin yeni tikililərin maliyyələşdirilməsi üçün istifadəsini üstün tutsa da, fondun şərtlərinə görə, köhnə tikililərin alınmasına da kredit ayrılır.
Ganja Bank 1994-cü ildən fəaliyyət göstərir. Bankın baş idarəsi Gəncə şəhərində yerləşir.
Azərbaycanda adi ipoteka kreditinin maksimum məbləği səkkiz faizlə 25 il müddətinə 50 min manat həcmindədir. Sosial ipoteka krediti isə illik dörd faizlə 30 il müddətinə 35 min manat həcmindədir. Adi və güzəştli kreditlərə ilkin ödəniş məbləği 15 faiz müəyyən olunub.
İpoteka kreditinin şərtləri aşağıdakılardır: kreditlər milli valyuta ilə yalnız Azərbaycan vətəndaşlarına verilir, ipoteka predmeti yalnız mənzillər və şəxsi evlər ola bilər, ipoteka kreditinin məbləği bazar qiymətinin 85 faizindən artıq olmamalıdır, kreditin aylıq ödənişi kredit götürənin aylıq gəlirinin 70 faizindən artıq olmamalıdır, həyat sığortası müqaviləsinin bağlanması və s.
Güzəştli kreditlər şəhid ailələrinə, milli qəhrəmanların ailələrinə, məcburi köçkünlərə, üç il iş təcrübəsi olan dövlət qulluğu əməkdaşlarına, namizədlik və doktorluq dərəcəsi olanlara, idman sahısində xüsusi xidmətləri olan şəxslərə, həmçinin üş il iş stajı olan hərbçilərə verilir.
Güzəştli kredit almaq haqqı ollan hər bir ailə bundan yalnız bir dəfə istifadə edə bilər.
17 bank fondun ayırdığı kreditin verilməsində iştirak edir. 2009-cu ildə dövlət büdcəsindən sosial ipotekanın verilməsi üçün 14 milyon manat ayrılması nəzərdə tutulub.
Bundan başqa fond bazara hərəsi 100 manat dəyərində 55 min nominal qiymətli kağız buraxıb. Emissiyanın ümumi həcmi 55 milyon manat təşkil edir ki, bunun da 38 milyon manatı artıq paylaşdırılıb. Bu emissiyanın tam paylaşdırılması 1100 ipoteka kreditinin verilməsinə imkan verəcək.
2005-2009-cu illər AİF tərəfindən ipoteka kreditlərinin verilməsi üçün Azərbaycan dövlət büdcəsindən 94 milyon manat ayrılması nəzərdə tutulmuşdu. Bunun da banklar tərəfindən yalnız 73 milyon manatı verilib.