Azərbaycan, Bakı, 14 oktyabr / Trend , müxbir N.İsmayılova/
"Azərbaycan Beynəlxalq Bankı (ABB) Amerikanın Ex-Im Bank və ABŞ hakimiyyətinin maliyyə korporasiyası OPİC-dən 100 milyon dollardan artıq kredit xəttinin açılmasına çalışır", - bankın İdarə Heyətini sədri Cahangir Hacıyev çərşənbə günü MDB ölkələrinin Bakıda keçirilən "MDB-nin maliyyə və bank sistemlərinin dayanıqlılığının yüksəldilməsi" II Beynəlxalq Bank Konfransında jurnalistlərə deyib.
"Bu maliyyə institutları ilə danışıqlar aparılıb və bu danışıqların konkret nəticələri də var. 12 il müddətinə verilən bu kreditin bir hissəsini ilin sonunadək alacağıq", - Hacıyev deyib.
Onun sözlərinə görə, bu vəsaitlər tikinti sektorunda başlayan, lakin yarımçıq qalan işlərin sona çatdırılmasına yönəldiləcək.
Hacıyev deyib ki, bundan başqa ABB ipoteka kreditlərinin verilməsi üçün OPİC-dən vəsait almağa hazırlaşır, lakin bu proses yarım il sürəcək.
O deyib ki, bank 15 il müddətinə verilən bu kredit xəttilə 120 milyon dollar vəsait cəlb etmək niyyətindədir.
Beynəlxalq Bank həmçinin, Royal Bank of Scotland-dan 100 milyon dollar məbləğində kredit xətti də açır. Bu məbləğin 20 milyon dolları bank tərəfindən artıq alınıb.
TREND və Day.az agentlikləri Beynəlxalq Bank Konfransına informasiya dəstəyi göstərir.
Məqalə müəllifi ilə əlaqə ünvanı: [email protected]