Azərbaycan, Bakı, 20 oktyabr / Trend , müxbir N.İsmayılova/
Azərbaycanın investisiya şirkəti (AİŞ) və Özəl Sektorun İnkişafı üzrə İslam Korporasiyası (ICD) tərəfindən təsis edilən Xəzər Beynəlxalq İnvestisiya Şirkəti (CIIC) ümumi dəyəri 30 milyon manat olan 10-15 layihəni nəzərdən keçirir, bu barədə bazar ertəsi CIIC-ın icraçı direktoru Toğrul Köçərli bildirib.
"Bu layihələrin nəzərdən keçirilməsi üçün daha 2-3 ay lazım gələcək. Onlar iqtisadiyyatın müxtəlif sahələrini, o cümlədən kənd təsərrüfatı, tikinti və loqistikanı əhatə edir" - Köçərli qeyd edib.
CIIC-ın nizamnamə kapitalı hazırda 23 milyon manata bərabərdir ki, onun da 17 milyon manatı xarici investorların payına düşür.
Caspian International Investment Company 2008-ci ilin mart ayında 2,954 milyon manat ilkin kapitalla qapalı səhmdar cəmiyyət kimi qeydiyyatdan keçib. AİŞ-nin pay hissəsi 25 faiz, ICD-nın payı hissəsi isə 75 faiz təşkil edib.
Kapitalın ötən ilin sentyabrın 23-nə kimi artırılması üçün Qiymətli Kağızlar üzrə Dövlət Komitəsi CIIC-ın 62040 səhminin emissiya prospektini qeydə alıb. Hər bir səhmin nominal dəyəri 850 manatdır.
Strategiyaya əsasən, CIIC-ın investisiyaları şəriət qaydalarına zidd olan spirtli içkilər və donuz əti məhsullarının istehsalı üzrə müəssisələr istisna olmaqla iqtisadiyyatın real sektoruna, həmçinin maliyyələşdirmə və sığorta xidmətlərinin göstərilməsində standart şərtlərlə fəaliyyət göstərən bank və sığorta təşkilatlarına qoyulacaq.
Oktyabrın 19-na olan rəsmi məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]
