Azərbaycan, Bakı, 20 oktyabr / Trend , müxbir N.İsmayılova/
2009-cu ilin birinci rübündə Azərbaycan Dövlət Neft Fondu aktivlərinin 99,76 faizini qiymətli kağızlara və beş il müddətinə qoyulmuş vəsaitlərə yatırıb. Bu barədə ADNF-in icraçı direktoru Şahmar Mövsümov bildirib.
Hazırda aktivlərin 44,12 faizi bir il müddətli, 43,01 faizi bir ildən üç ilədək müddətli qiymətli kağızlara, 12,63 faizi üç ildən beş ilədək müddətli qiymətli kağızlara, həmçinin gəlirlərin 0,24 faizi, eyni zamanda 0,04 faiz beş ildən yeddi ilədək çoxmüddətli səhmlərə yatırılıb.
Fondun aktivləri əsasən Moody və Standard & Poor beynəlxalq reytinq agentlikləri tərəfindən verilən yüksək reytinqli istiqrazlara yatırılır.
Hazırda fondun aktivlərinin 74,8 faizi "AAA" reytinqli qiymətli kağızların, 13,73 faizi "AA", 11,26 faizi "A", 0,13 faizi "BBB", 0,08 faizi isə digərlərinin payına düşür. Fondun aktivləri Mərkəzi Bankda sərmayə reytinqindən aşağı yerləşdirilə bilməz.
ADNF-in aktivləri qismən qiymətli kağızlara, pul bazarı alətlərinə (depozit, bank hesabları) yatırılıb. Aksiyalara fondun aktivlərinin cəmi 0,04 faizi yatırılıb. Hazırda fondun aktivlərinin 40,18 faizi agentliklərin və beynəlxalq təşkilatların istiqrazlarına, 32,18 faizi suveren borc kağızlarına, 3,86 faizi depozitlərə və pul bazarı alətlərinə, 0,42 faizi isə bank hesablarına, 20,08 faizi maliyyə təkilatlarına, 2,65 faizi korporativ istiqrazlara, 0,54 faizi qısamüddətli kommersiya kağızlarına yatırılıb.
Neft Fondunun aktivlərinin coğrafi yerləşdirilməsi aşağıdakı kimidir: 63,24 faiz Avropa ölkələrinə, 21,42 faiz Şimali Amerika, 12,82 faiz beynəlxalq maliyyə təşkilatlarına, 1,86 faiz isə Asiya və Sakit okean regionuna yatırılıb.
Məqalə müəllifi ilə əlaqə ünvanı: [email protected]
