Özbəkistan, Daşkənd, 27 oktyabr / Trend , müxbir D.Əzizov/
Respublikanın Dövlət Statistika Komitəsinin məlumatına görə, Özbəkistanda yanvar-sentyabr aylarında kömür hasilatı 2008-ci ilin analoji dövrü ilə müqayisədə 2,7 faiz artaraq 2,737 milyon tona çatıb.
2007-ci ilin yekunları ilə müqayisədə 2008-ci ildə respublikada kömür hasilatı 1,6 faiz artaraq 3,602 milyon tona çatıb. Respublikada bərk yanacaq hasilatının 98 faizi "Özbəkkömür" ASC-nin payına düşür.
Özbəkistanda kömür 3 mədəndə hasil edilir: Anqren, Şarqun, Baysun. Respublikada kömur hasilatı əsasən açıq üsulla, cüzi bir hissəsi isə yeraltı üsulla əldə edilir.
Hazırda "Özbəkkömür" ASC 1,9 milyard ton təsdiqlənmiş kömür ehtiyatı olan Özbəkistanın Daşkənd vilayətində yerləşən böyük yatağı - "Anqren" kömür yatağının işlənməsini həyata keçirir.
Ekspertlərin fikrincə, Özbəkistanın bərk yanacağa olan illik tələbatı təxminən 4 milyon ton təşkil edir. Respublikada kömürün əsas istehlakçıları "Özbəkenerqo" DSŞ ildə 3 milyon ton bərk yanacaq sərf edən və bərk yanacaqla işləyən istilik enerjisi stansiyalarıdır.
Məqalə müəllifi ilə əlaqə ünvanı: [email protected]