Azərbaycan, Bakı, 10 noyabr / Trend , müxbir N.İsmayılova/
İsrail şirkətlərinin Azərbaycanın kənd təsərrüfatı sektoruna cəlb olunması proqramı çərçivəsində İsrail səfirliyinin dəvəti ilə noyabrın 9-dan 11-dək İsrailin kənd təsərrüfatının müxtəlif sahələrində beş aparıcı şirkətinin nümayəndələri Azərbaycanda səfərdədirlər. Bu barədə İsrailin Azərbaycandakı səfirliyinin məlumatında deyilir.
Şirkətlər sırasına Prinir - qida emalı, məhsul yığımı sonrası bacarıqlar, AgriCo - südçülük istiqamətli heyvandarlıq sahəsi, Soli ltd. - bitkiçilik, Netafim - damla üsullu suvarma və G.A.T. - istixanalar, toxumçuluq, heyvandarlıq sahələri - daxildir.
Səfər planına Azərbaycanın aparıcı şirkətləri ilə görüşlər, Samux, Gəncə və Şəmkir rayonlarına səfərlər daxildir. Noyabrın 9-da keçirilən biznes forumunun açılışında İsrail səfiri cənab Mixael Lavon-Lotem deyib ki, lazım olan sahələrdə bilik və təcrübəni genişləndirməyi təklif etməklə, o, yerli və İsrail şirkətləri arasında vacib sövdələşmələrə daim çalışacaqdır.