Azərbaycan, Bakı, 18 noyabr / Trend , müxbir Ü.İsmayılova/
Azərbaycan Gürcüstanın strateji tərəfdaşıdır və ölkə hökümətlərarası iqtisadi əlaqələrin inkişafına xüsusi əhəmiyyət verir. Bu barədə Rakia sərbəst sənaye zonasının təqdimatında Gürcüstanın iqtisadi inkişaf naziri Zurab Pololikaşvili azərbaycanlı həmkarı Şahin Mustafayevin rəhbərlik etdiyi Azərbaycan nümayəndə heyətinə müraciətində deyib.
O, SOCAR Georgia (Azərbaycan Respublikası Dövlət Neft Şirkətinin törəmə müəssisəsi) şirkətinin ilin sərmayədarı kimi tanındığını qeyd edərək, azərbaycanlı iş adamlarını Gürcüstanın Rakia sərbəst sənaye zonasının imkanlarından istifadə etməyə dəvət edib.
Azərbaycanın iqtisadi inkişaf naziri Şahin Mustafayev həmçinin ölkədə münasib biznes iqliminin yaradılması barədə məlumat verib. Keçirilən məqsədyönlü tədbirlər nəticəsində sahibkarlığa dövlət dəstəyi gücləndirilib, qonşu ölkələrlə, o cümlədən Gürcüstanla ikitərəfli əlaqələrin inkişafında ciddi irəliləyişlər əldə edilib.
Hazırda Gürcüstanda azərbaycanlı iş adamları tərəfindən yaradılan 40-dan çox iri şirkət fəaliyyət göstərir. "İkitərəfli əlaqələrin və Azərbaycan şirkətlərinin fəaliyyətinin genişləndirilməsi məqsədilə sentyabrda Azərbaycan İxracın və İnvestisiyaların Təşviqi Fondunun (AZPROMO) Gürcüstanda nümayəndəliyi açılıb", - nazir deyib.
Nazir həmçinin qeyd edib ki, xüsusi iqtisadi zonaların yaradılması sahəsində Gürcüstan təcrübəsinin öyrənilməsi məqsədilə Azərbaycan nümayəndə heyəti bu il Potidə olub və azərbaycanlı iş adamları Rakia sərbəst sənaye zonasının biznes imkanları ilə tanış olmaq üçün dəvət alıblar.
Təqdimat zamanı zonanın direktoru Xater Massaad qonaqları zonanın təşkilati-idarə strukturları və fəaliyyət prinsipləri ilə tanış edib.
Təqdimat İqtisadi İnkişaf Nazirıliyi yanında AZPROMO və Azərbaycanın Gürcüstandakı səfirliyinin dəstəyi ilə keçirilib. Təqdimatda Azərbaycan və Gürcüstanın İqtisadi İnkişaf nazirliklərinin nümayəndələri, diplomatik nümayəndəliklər və 80-dan çox sahibkar iştirak edib.
Məqalə müəllifi ilə əlaqə ünvanı: [email protected]
