Azərbaycan, Bakı, 05 yanvar / Trend , müxbir Ü.İsmayılova/
"Azərbaycanda yanvar ayının 1-dən beynəlxalq audit standartları tətbiq edilməyə başlayıb", - bu barədə Azərbaycanın Auditorlar Palatasının rəhbərinin müşaviri Nəcəf Talıbov çərşənbə axşamı məlumat verib.
"Auditorlar Palatası dekabrın 25-də Azərbaycan dilində beynəlxalq audit standartları təqdim edilən kitabların təqdimatını keçirib", - Talıbov deyib.
Onun sözlərinə görə, beynəlxalq standartların öyrənilməsi və tətbiq edilməsi məqsədilə kitablar auditorlara paylanıb.
2010-cu ildə bu standartlara riayət etməyən auditorlara qarşı sanksiya tətbiq ediləcək", - Talıbov deyib.
Talıbov qeyd edib ki, Azərbaycanda beynəlxalq audit standartlarının tətbiqi 4 mərhələdə həyata keçirilir. Birinci mərhələ hüquq bazasının təkmilləşdirilməsini, ikinci mərhələ normativ bazanın təkmilləşdirilməsini, üçüncü mərhələ kadralrın hazırlanmasını, dördüncü mərhələ isə beynəlxalq standartlara cavab verən keyfiyyətə nəzarəti əhatə edir.
Palatanın müşaviri deyib ki, palata artıq bu dörd mərhələnin hamısını keçib və bu tələbləri yerinə yetirməyə tam hazırdır.
Azərbaycanın Auditorlar Palatası 1995-ci ilin sentyabr ayında təsis edilib və öz aktiv fəaliyyətinə 1996-cı ilin aprel ayından başlayıb. Azərbaycanda "Auditor fəaliyyəti haqda" qanun 1994-cü ildə qəbul edilib.
