Azərbaycan, Bakı, 26 yanvar / Trend , müxbir N.İsmayılova/
Ötən ilin yekununa görə Mərkəzi Bank yanında (AMB) Azərbaycanın Mərkəzləşdirilmiş Kredit Reyestri (MKR) Xidmətinə ölkənin 38 bankından 74 393 müraciət daxil olub. Bu barədə MKR-dən deyilib. Müraciətlərin ümumi sayının 60 182-si yeni borc alanlar haqqında olub.
2008-ci illə müqayisədə xidmətə daxil olan müraciətlərin sayı 5,65 dəfə artıb. 2008-ci il ərzində müraciətlərin ümumi sayı 13160 təşkil edib. Hesabat dövrü ərzində 138 nəfər şəxsi kredit hesabatını əldə etmək məqsədilə MKR-ə müraciət edib.
Bu gün ölkənin bütün bankları MKR xidmətinə qoşulub, lakin 2009-cu il ərzində yalnız 37 bankdan müraciət daxil olub. Ən aktiv beş bank - Royal Bank, Bank Respublika, Parabank, Accessbank və AG Bank olub.
Ilin sonuna olan məlumata görə, reyestrdə məlumatı olan borc alanların sayı 704275 təşkil edir, kredit məlumatlarının ümumi sayı isə 1280905 təşkil edir ki, bu da 2008-ci ilin anoloji dövründə olan göstəriciləri müvafiq olaraq 52 və 66 faiz ötür.
İlin sonuna olan məlumata görə, reyestrdə 263364 zamin haqqında məlumat toplanıb.
MKR 2005-ci ilin mart ayından fəaliyyət göstərir. Fiziki şəxs üçün bir ərizənin tarifi 1,1 manat, hüquqi şəxs üçünsə 2 manat təşkil edir. Kredit reyestri ticari məqsəd daşımır. Tariflər administrativ xərcləri ödəmək üçün nəzərdə tutulub.
Yanvarın 26-na olan rəsmi məzənnə 0,8034 AZN/USD təşkil edir.
