Azərbaycan, Bakı, 12 fevral / Trend , müxbir Ü.İsmayılova/
Azərbaycanın Standartlaşdırma, Metrologiya və Patent üzrə Dövlət Komitəsi 2009-cu ildə 70 milli standart işləyib hazırlayıb. Bu barədə Dövlət Komitəsinin sədri Ramiz Həsənov cümə günü keçirilən mətbuat konfransında bildirib.
"Onlar arasında ingilis dilindən milli dilə tərcümə olunan ISO:9001 və ISO:17000 025 (kalibrləmə laboratoriyasına tələblər) standartları, daşınmaz əmlakın qiymətləndirilməsi standartlarının hazırlanması, qida sənayesinin bir neçə standartı, təftiş orqanlarına olan tələblər var", - Həsənov deyib.
Onun sözlərinə görə, hazırda Azərbaycanda pirotexnika milli standartı müvafiq strukturlarla birgə hazırlanır. "Yaxın bir neçə ay ərzində bu standartın qəbuluna ümid edirik", - o deyib.
Dövlət Komitəsinin sədri bildirib ki, qaz qurğuları üzrə milli tələblər hazırlanır. Hazırda Azərbaycanda MDB ölkələrinin standartlaşdırma və metrologiya üzrə komitələrinin standartları tətbiq edilir.
