Azərbaycan, Bakı, 24 fevral / Trend , Ü.İsmayılova/
Yanvarda Bakıda tikinti materialları bazarında qiymətlər dekabr ilə müqayisədə iki faiz ucuzlaşıb. Bu barədə çərşənbə günü "Daşınmaz əmlak bazarının iştirakçıları" ictimai birliyindən məlumat verilib.
Məlumatda qeyd olunur ki, illik hesablamada qiymətlər 24,3 fazi artıb.
Yanvarda 38 adda 89 növ inşaat materialı arasında monitorinq keçirilib. Onların arasında 13 növün qiyməti enib, 13 növün qiyməti isə artıb. Qalan 63 növün qiyməti sabit qalıb. Yerli istehsalda tikinti materiallarının payı 53,9 faiz təşkil edib.
"Tikinti materialları bazarında iki faiz azalma böyük tələbata malik inşaat materiallarının ucuzlaşması ilə əlaqədar baş verib", - məlumatda qeyd olunur.
Yanvarda armaturun qiyməti 3,99 faiz, asma tavan 11,11 faiz, izolyasiya materialları 7,41 faiz, plastik borunun qiyməti 4,78 faiz artıb.
Şüşə məmulatlarının qiymətində 7,69 faiz, laminat parketin qiymətində 6,12 faiz və digər malların qiymətlərində azalma müşahidə edilib.
