Azərbaycan, Bakı, 24 fevral / Trend , müxbir N.İsmayılova/
Beynəlxalq Valyuta Fondu (BVF) Azərbaycan hökumətinin manatın sabit məzənnəsinin saxlanmasına dair siyasətini dəstəkləyir. Bu barədə çərşənbə günü Bakıda səfərdə olan BVF-in Azərbaycan üzrə missiyasının rəhbəri xanım Ninke Omes Azərbaycan-Amerika Ticarət-Sənaye Palatasının üzvləri üçün təqdimat zamanı bildirib.
"2009-cu ildə Qafqaz və Mərkəzi Asiya regionlarının əksər ölkələrində milli valyutanın dollara və rubla nisbətdə devalvasiyası müşahidə edilib. Azərbaycan və Türkmənistan istisna təşkil edib. Bu ölkələrin hökumətləri milli valyutanın sabit məzənnəsinin saxlanması barədə qərar qəbul ediblər", - Omes vurğulayıb.
Onun sözlərinə görə, bu, Azərbaycana inflyasiyanı və digər ölkələrdə müşahidə olunan iqtisadiyyatın dollarlaşmasının səviyyəsini azaltmağa imkan verib.
"BVF Azərbaycan hökumətinin sabit manat siyasətinin aparılmasına dair qərarını dəstəkləyir. Bunun nəticəsində ölkədə istehlak qiymətləri enib", - o bildirib.
