Azərbaycan, Bakı, 02 mart / Trend , müxbir N.İsmayılova/
2009-cu ildə Azərbaycanın dövlət büdcəsinin faktiki mədaxil hissəsi 12,177 milyon manatlıq proqnoza qarşı 10,326 milyon manat təşkil edib. Xəzinəyə daxilolmalar 2008-ci illə müqayisədə 4,1 faiz azalıb və büdcənin mədaxil hissəsi 84,8 faiz icra olunub. Bu barədə Maliyyə Nazirliyinin məlumatında deyilir.
Dövlət büdcəsinin xərcləri 1,9 faiz azalaraq 10,567 milyon manat təşkil edib (12,355 milyon manatlıq proqnoza qarşı və 85,5 faiz icra sayəsində). 2009-cu il ərzində dövlət büdcəsinin defisiti 241,1 milyon manat təşkil edib.
Azərbaycan Respublikasının Vergilər Nazirliyi mədaxil proqnozunu 71,5 faiz icra etməklə dövlət büdcəsinə 4114 milyon manat vəsait təmin etdib ki, bu da proqnoza nisbətən 1636,5 milyon manat manat, 2008-ci illə müqayisədə isə 1581,9 milyon manat və ya 27,8 faiz azdır. Azərbaycan Respublikasının Dövlət Gömrük Komitəsi proqnoza 85,6 faiz əməl edərək büdcəyə 1113 milyon manat vəsait təmin etdib ki, bu da proqnoza nisbətən 187,3 milyon manat az, 2008-ci illə müqayisədə isə 2,3 milyon manat və ya 0,2 faiz çoxdur. Azərbaycan Respublikası Dövlət Neft Fondundan büdcəyə 4915 milyon manat vəsait daxil olub ki, bu da 2008-ci illə müqayisədə 29,3 faiz çoxdur.
2009-cu ildə dövlət büdcəsinə vergi orqanları vasitəsilə toplanmış vəsaitin 30,9 faizi və ya 12723 milyon manatı ARDNŞ-nin (Azərbaycan Respublikası Dövlət Neft Şirkəti), 12,5 faizi və ya 513,2 milyon manatı Azərbaycan Beynəlxalq Əməliyyat Şirkətinin mənfəət vergisinin payına düşür. 2008-ci illə müqayisədə ARDNŞ tərəfindən dövlət büdcəsinə 1,2 faiz və ya 15,8 milyon manat, Azərbaycan Beynəlxalq Əməliyyat Şirkətinin mənfəət vergisindən isə 76,1 faiz və ya 1636,2 milyon manat az vəsait daxil olub.
Dövlət büdcəsinə daxil olan vergilərdən 56,6 faiz yaxud, 2327,7 milyon manat qeyri-neft gəlirlərinin hesabına təmin edilib ki, bu da proqnozdan 24,2 faiz azdır və 2008-ci ilin analoji göstəricisini 3,1 faiz, yaxud 70 milyon manat ötür.
Büdcə vəsaitlərindən sosial müdafiə və sosial təminat xərclərinə 1054,4 milyon, təhsil xərclərinə 168,2 milyon manat, müdafiə xərclərinə 1183,9 milyon manat, səhiyyə xərclərinə 402,4 milyon manat, məhkəmə hakimiyyəti, hüquq-mühafizə və prokurorluq xərclərinə 648,9 milyon manat, iqtisadi fəaliyyətlə bağlı xərclərə 146,3 milyon manat xərclənib. Mənzil və kommunal təsərrüfatına 194,5 milyon manat, kənd təsərrüfatı, meşə təsərrüfatı, balıqçılıq, ovçuluq və ətraf mühitin mühafizəsi xərclərinə 390,4 milyon manat, rabitə və nəqliyyat xərclərinə 75,3 milyon manat xərclənib.
2009-cu ildə sosialyönümlü tədbirlərin (elm, təhsil, səhiyyə, sosial təminat, mədəniyyət xərcləri) maliyyələşdirilməsinə dövlət büdcəsi xərclərinin 26,2 faizi və ya 2763 milyon manat yönəldilib ki, bu da 2008-ci illə müqayisədə 450,4 milyon manat və ya 19,5 faiz çoxdur.
Martın 02-nə olan rəsmi məzənnə 0,8034 AZN/USD təşkil edir.
