Azərbaycan, Bakı, 12 mart / Trend , müxbir N.İsmayılova/
Azərbaycanın poçt rabitə operatoru - "Azərpoct" MMC tərəfindən bank xidmətlərinin həyata keçirilməsi məqsədilə lisenziya alınması üçün Mərkəzi Bankda 1000 manat məbləğində dövlət rüsumu müəyyən edilib. Bu barədə "Poçt rabitəsi haqqında" qanunun icrası ilə əlaqədar Prezidentin bəzi fərmanlarına əlavələrin və dəyişikliklərin edilməsi barədə Azərbaycan Prezidenti İlham Əliyevin fərmanında deyilir.
"Azərpoçt" MMC bank xidmətlərinin göstərilməsi üçün lisenziya almaqdan ötrü AMB-yə müraciət edib. MMC-dən bildirilib ki, icazənin verilməsi məsələsi ayın sonuna kimi həll oluna bilər.
Bank maliyyə xidmətlərinin göstərilməsi "Azərpoçt"da yaradılan avtomatlaşdırılmış korporativ-informasiya sistemi sayəsində mümkün olacaq. Hazırda bu sistem istismar təcrübəsinə hazırdır. "Azərpoçt"un avtomatlaşdırılmış sisteminə 200-dən çox poçt rabitəsi şöbəsi daxildir. Operator tərəfindən tenderlər keçirilib, müvafiq texniki avadanlığın alınması və quraşdırılması üzrə müqavilələr imzalanıb. Ən qısa müddətdə texniki təchizat başa çatdıqdan sonra, avtomatlaşdırılmış korporativ-informasiya sisteminə bütün poçt rabitəsi şöbələri qoşula bilər.
İlkin mərhələdə poçt şöbələri məhdudlaşdırılmış bank əməliyyatları təqdim edəcəklər, onlara kassa əməliyyatlarının aparılması, pulköçürmələri, müştəri hesablarının açılması və s. daxildir. Uzunmüddətli perspektivdə əhaliyə kreditlərin verilməsi də nəzərdə tutulur.
"Poçt rabitəsi haqqında" qanuna görə, "Azərpoçt"un funksiyaları genişləndirilib. 2005-ci ildən ölkədə Dünya Bankının dəstəyi ilə poçt şöbələrində "Maliyyə xidmətlərinin inkişafı" layihəsi həyata keçirilir.
Hazırda ölkə ərazisində1600-dan çox poçt şöbəsi fəaliyyət göstərir. Onların, təxminən, 340-ı şəhərlərdə, rayon mərkəzlərində və qəsəbələrdə, qalanları isə kənd yerlərində əhaliyə xidmət göstərir. Azərbaycanda bank sistemi 626 filiala malikdir. Ölkədə 46 bank fəaliyyət göstərir.