Azərbaycanda qeyri-neft sektorunda iri vergiödəyicilərinin sayı artıb
Azərbaycan, Bakı, 31 mart / Trend , müxbir N.İsmayılova/
Azərbaycanın qeyri-neft sektorunda fəaliyyət göstərən iri vergiödəyicilərinin sayı 9,9% artaraq 2010-cu il yanvarın 1-nə 664 vergiödəyicisi təşkil edib. Bunu Xüsusi Rejimli Vergi Xidməti Departamentinin şöbə müdiri Zaur Fətizadə "Vergilər" qəzetinə verdiyi müsahibədə deyib.
"Nəticədə 2009-cu ildə qeyri-neft sektorundan dövlət büdcəsinə 1,372 milyard manat daxil olub ki, bu da bütün respublika üzrə həmin sektordan daxiolmaların 63,1%-ni təşkil edib", - Fətizadə deyib.
Onun sözlərinə görə, mərkəzləşdirilmiş departamentdə 692 vergiödəyicisi qeydiyyatdadır və onlardan 421-i ƏDV ödəyicisidir. O cümlədən, xüsusi vergi rejimi çərçivəsində fəaliyyət göstərən 169 ödəyici departamentdə qeydiyyatdan keçib.
"2009-cu ildə vergi daxilolmalarının 4,114 milyard manatından ümumi həcmin 76,8 %-i, yaxud 3,159 milyard manatı departamentin xətti vasitəsilə təmin olunub", - Fətizadə deyib.
Departament vasitəsilə qeyri-neft sektorundan daxilolmalar 2009-cu ildə 2008-ci ilə nisbətən 2,8% artıb.
