Türkmənistan, Aşqabad, 3 aprel /Trend, müxbir H.Həsənov/
ATƏT-in nümayəndə heyəti Aşqabadda ekoloji təhlükəsizlik məsələlərini və ölkənin tranzit imkanlarından istifadənin mümkünlüyünü öyrənir. Bu barədə Türkmənistanın rəsmi mənbələri məlumat verib.
Nümayəndə heyətinə ATƏT-in fəaliyyətdə olan sədrinin ekologiya məsələləri üzrə xüsusi nümayəndəsi Struan Stivenson və nəqliyyat üzrə xüsusi nümayəndə Vitautas Naudujas daxildir. Onlar XİN-də, Dəmiryol NəqLiyyatı, Su Təsərrüfatı, Təbiətin Mühafizəsi və Avtomobil nazirliklərində görüşlər keçiriblər.
Altın Asır milli telekanalının məlumatına görə, Türkmənistanın torpaqların meliorasiyası və torpaqların şoranlaşdırılmasının qarşısının alınması, suvarma texnologiyalarının yaxşılaşdırılması, deqradasiya olunmuş otlaq və meşə sahələrinin bərpası, təbii, torpaq və su resurslarının monitorinqinin aparılması sahəsində layihələrin reallaşmasında təcrübəsi var.
Məlumatda deyilir ki, regionun sosial-iqtisadi inkişafı kontekstində yaradılan nəqliyyat infrastrukturu, əsasən Fars körfəzinə çıxışı olan Qazaxıstan-Türkmənistan-İran dəmiryol magistralının inşası mühüm əhəmiyyət daşıyacaq.