Azərbaycan, Bakı, 30 aprel /Trend, müxbir E.İsmayılov/
Bakı-Tbilisi-Qars (BTQ) dəmiryol nəqliyyatının yaradılması çərçivəsində tikinti işləri mayın sonunda bərpa ediləcək. Bu barədə cümə günü "Azərbaycan Dəmir Yolları" QSC-dəki mənbə bildirib.
"Hazırda Türkiyə və Gürcüstan sərhədində qarın əriməməsi səbəbindən tikinti işləri bərpa olunmayıb", - mənbə deyib.
Onun sözlərinə görə, artıq texnikanın dislokasiyası üzrə işlər keçirilir və dəmiryolun Marabda-Axalkalaki hissəsində reabilitasiya işləri başlayıb. Reabilitasiya işlərini Gürcüstan şirkəti ilə birgə tenderin qalibi olan "Azərtikintiservis" aparır. Şirkətin apardığı işlər çərçivəsində artıq mövcud dəmiryollarının 160 kilometrlik hissəsində reabilitasiya işləri aparılacaq.
BTQ tikintisi üzrə işlərin 2011-ci ilin sonunda başa çatdırılması planlaşdırılır.
Layihə çərçivəsində Gürcüstanın Axalkalaki dəmiryol stansiyasının inşası üzrə tenderin qalibi artıq müəyyən olub. Layihənin qalibi Azərbaycanın arxitektur layihə-sənaye şirkəti "Kontur"dur.
Axalkalaki stansiyasının inşası 2010-cu ilin əvvəlinə, başa çatması isə 2011-ci ilə planlaşdırılır.
"Bakı-Tbilisi-Qars" layihəsi çərçivəsində yeni 105 kilometrlik qolun, Türkiyə ərazisindən keçən 76 kilometrlik, Gürcüstan ərazisindən keçən 29 kilometrlik yeni magistral dəmiryolun inşası planlaşdırılır. Bundan başqa, Gürcüstanın Axalkalaki-Maraba-Tbilisi dəmiryol hissəsi ildə 15 milyon tona kimi yükburaxma qabiliyyətinə malik olmaq üçün yenidən qurulacaq.