Аzərbaycan, Bakı, 18 may /Trend, müxbir N.İsmayılova/
"Təmiz Şəhər" ASC tərəfindən aparılan inventarizasiya nəticəsində iki mindən çox qeyri-qanuni zibillik sahələri aşkarlanıb. Bu barədə çərşənbə axşamı ASC-nin sədri Zakir İbrahimov bildirib.
İnventarizasiya "Təmiz Şəhər" ASC-nin sifarişi ilə "EKO-REAL" və Milli Ekoloji Proqnozlar Mərkəzi tərəfindən aparılıb.
İbrahimovun sözlərinə görə, mövcud zibillik sahələrinin ləğv edilməsi məqsədilə nəzərdə tutulmuş tədbirlərin həyata keçirilməsi üçün işçi qrupu yaradılıb ki, onun da tərkibinə ASC, Ekologiya və Təbii Sərvətlər Nazirliyi, Bakı şəhər İcra Hakimiyyətinin nümayəndələri daxildir.
"Yaradılmış işçi qrupunun əsas vəzifəsi qanunvericilik faktlarını aşkar etməkdir. "Təmiz Şəhər" öz fəaliyyətində keçirilmiş inventarizasiya hesabatlarına əsaslanacaq", - o bildirib.
Balaxanı qəsəbəsində 20 hektarlıq ərazidə "Balaxanı LTD" MMC məişət tullantılarının yandırılması zavodu tikiləcək. Zavodun gücü ildə 500 min ton bərk məişət tullantıları təşkil edəcək. Bundan əlavə, zavod ildə 10 min tondan çox tibbi tullantıların yandırılması gücünə malikdir. Tullantıların yandırılması nəticəsində ildə 231,5 milyon kilovat-saat həcmində şəhər şəbəkəsinə ötürüləcək elektrik enerjisi istehsal olunacaq. Zavod 2012-ci ildə istismara veriləcək.
Elektrik enerjisinin verilməsi ilə bağlı bütün texniki məsələlər zavodun istismara veriləcəyi müddətə qədər müzakirə olunacaq.
36 ay ərzində zavodun tikilməsi üçün ayrılan ümumi dəyər 346 milyon dollar təşkil edir.
Zibilyandırma zavodunun 250 min ton həcmində iki xətti və elektrik enerjisinin istehsalı üçün turbini olacaq. Layihənin şərtlərinə görə, gələcəkdə zavodun gücü 250 min tona qədər artırıla bilər. Tullantıların yandırılması nəticəsində alınan kül yol inşasında istifadə oluna bilər.
Hazırda Bakıda və Abşeron yarımadasında toplanan məişət tullantılarının 80 faizi məhv edilməsi üçün Balaxanı poliqonuna göndərilir.
"Balaxanı LTD" MMC-nin təsisçisi CNIM Azerbaijan LTD MMC-dir. Təşkilat 2009-cu ilin noyabrında dövlət tərəfindən qeydiyyatdan keçib. Həmin gün yeni zavodun tikintisinin bünövrəsi barədə rəsmi tədbir təşkil olunub.
"Balaxanı LTD" MMC-in rəsmi nümayəndəsi Fuad Musayevdir. Şirkətin ümumi kapitalı 1000 manat təşkil edir. Şirkətin Müşahidə Şurasının üzvləri Berta Andre Auqusta Culies və Dmitrief Nikolasdır.
Mayın 18-nə olan rəsmi məzənnə 0,8036 AZN/USD təşkil edir.