Azərbaycan, Bakı, 19 may /Trend, müxbir H.Vəliyev/
Kür çayının daşması nəticəsində Şirvan-Astara istiqamətində dəmiryolda yaranmış çətinliklər artır. Bu barədə çərşənbə günü "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
Onun sözlərinə görə, Azadkənd-Salmanlı dəmiryol mənzilinin 19-cu kilometrində suyun qarşısının alınması məqsədi ilə dəmiryol sökülüb.
Mayın 9-da Osmanlı-Azadkənd dəmiryol mənzilinin 15-ci kilometrində yaşayış sahələrinin su altında qalmasının qarşısının alınması məqsədilə suyun dəmiryolun altından keçməsi üçün tədbirlər görülüb. Astara istiqamətində qatarların hərəkəti dayandırılıb.
14 vaqondan ibarət Bakı-Astara-Horadiz qatarı Şirvana qədər vahid şəkildə gedir. Orada isə Bakı-Astara və Bakı-Horadiz qatarlarına ayrılır. Hazırda Horadizə qatarların hərəkəti davam edir, Astaraya isə hərəkət dayanıb. Astara istiqamətində sutka ərzində 300 nəfər daşınır.
Bu gün Osmanlı-Azadkənd dəmiryol mənzilinin 15-ci kilometrində yeni körpünün tikilməsi və yolun bərpa olunması üzrə layihələrin hazırlanması gedir.
Sahilbərkitmə işlərinin aparılması məqsədilə qəza yerinə daş plitələr və köhnə beton şpallarla dolu vaqonlar gətirilir.