Azərbaycan, Bakı, 29 may /Trend, müxbir S.Süleymanov/
Qazaxıstan yaxın vaxtlarda özünün istehsal etdiyi 30 min ton taxılı Çinə ixrac etmək niyyətindədir. Bu barədə "Prodkorporasiya" MŞ SC-nin kommersiya məsələləri üzrə idarəetmə direktoru Daulet Uvaşev bildirib. "Biz artıq Çinə 20 min ton taxıl satmışıq. Planlarda daha 30 min ton taxılın ixrac olunması var", - Uvaşev deyib.
Xəbər verildiyi kimi, Qazaxıstan cari ilin əvvəlindən ilk dəfə öz buğdasını Çin bazarlarına ixrac edib. Baş nazir Kərim Məsimov dəfələrlə bildirib ki, qazax taxılı təkcə qərb istiqamətində deyil, eləcə də şərqə, məhz qonşu Çinə göndərilməsi üçün özünə yol açmalıdır. "Prodkorporasiya" ilə Çinin "COFCO" şirkəti arasında Qazaxıstan buğdasının ilkin ixracı haqqında razılaşma əldə olunub.
"Bu gün Çin hökuməti yerli ərzaq buğdasının bir tonunun alış qiymətini 235 dollar məbləğində müəyyən edib. Bizim taxılın qiymətinə gəldikdə, bu, hələ ətraflı danışıqların mövzusudur", - Uvaşev qeyd edib.
Onun sözlərinə görə, Çin öz ölkəsindən qazax taxılının Cənub-Şərqi Asiyaya, məhz Yaponiya, Cənubi Koreya, Tailand və Malayziyaya tədarüküi üçün tranzitin verilməsi ilə razılaşıb.
