Azərbaycan, Bakı, 29 may / Trend , müxbir A.Bədəlova/
Azərbaycan iqtisadiyyatı digər ölkələrin iqtisadiyyatlarından fərqli olaraq, dünya maliyyə-iqtisadi böhranının əhəmiyyətli nəticələrindən qaçıb. Kolumbiya Universitetinin professoru, 1999-cu ildə iqtisadiyyat üzrə Nobel mükafatı laureatı, optimal valyuta zonaları nəzəriyyəsinin banisi Robert Mandell belə hesab edir. Bununla yanaşı, o qeyd edib ki, ölkə neftin dünyadakı qiymətlərindən böyük asılılıqdadır.
"İndi neftin qiymətləri nöqteyi-nəzərindən çox yaxşı dövrdür, lakin əgər o, yenidən düşərsə, bu, iqtisadiyyata ziyan gətirəcək", - Mandell Trendp-ə deyib.
Onun sözlərinə görə, dollarla avro arasındakı böyük tərəddüdlər, xüsusilə də Azərbaycan, Gürcüstan və Ermənistan kimi ölkələr üçün böyük çətinliklər yaradır. Tərəddüdlərin yaratdığı çətinliklər bu iri valyutalardan birinin sabitləşməsindədir. O cümlədən, Mandell bildirib ki, dollar zonasında dolların kəskin artımı ayrı-ayrı ölkələrin iqtisadiyyatlarının çökməsinə gətirib çıxara bilər.
Onun sözlərinə görə, Avropa və Amerika valyutalarının tərəddüdlərinin doğurduğu ziyanın minimallaşdırılması vahid dünya valyutasının yaradılması ola bilər ki, bu da qısamüddətli perspektivdə dolların və avronun mübadilə məzənnəsinin sabitləşməsinə kömək edər.
Robert Mandell yapon iyeni, Amerika dolları, avro və ola bilsin, Çin yuanını birləşdirəcək Intor yeni dünya valyutasının yaradılması ideyasının banisidir.
Avropa valyutasının gələcək dinamikası haqqında danışan Mandell deyib ki, bu gün adamlar avronun böhranını fiskal böhranla qarışdırırlar. Onun fikrincə, bu gün Avropada baş verən hadisələri kökündən avro ilə bağlamaq lazım deyil. "Bu, fiskal böhrandır, avronun böhranı deyil", - Mandell belə hesab edir.
İndi, onun sözlərinə görə, bərpa dövrü başlayıb. "Asiya kifayət qədər yaxşı vəziyyətdədir, ABŞ iqtisadiyyatı da bərpa olunur", - Mandell deyib.
Lakin eyni zamanda o, Amerika dollarının nisbətən güclü mövqeyi ilə bağlı narahatlığını ifadə edib. "Güclü dollar Amerika iqtisadiyyatının artımını geriyə ata bilər", - Mandell bildirib.
Robert Mandell 1999-cu ildə valyuta məzənnələrinin müxtəlif rejimlərində pul və fiskal siyasətin təhlili, eləcə də optimal valyuta zonalarının təhlilinə görə Nobel mükafatı laureatıdır.