Azərbaycan, Bakı, 11 iyun /Trend, müxbir E.İsmayılov/
"Avro-2" standartlarına cavab verməyən avtomobil vasitələrinin gətirilməsinə məhdudiyyət qoyulduqdan sonra Azərbaycana idxal edilən avtomobillər xüsusi sınaq mərkəzlərində ekspertizadan keçəcəklər. Bu barədə Standartlaşdırma, Metrologiya və Patent üzrə Dövlət Komitəsinin texniki tənzimləmə və standartlaşdırma şöbəsinin müdiri Sadiq Abdullayev deyib.
"Avtomobillər sınaqdan müvafiq akkreditə edilmiş sınaq mərkəzlərində keçməli olacaqlar", - Abdullayev qeyd edib.
Onun sözlərinə görə, bu mərkəz-laboratoriyalar, misal üçün, Dövlət Yol Polisində, Ekologiya və Təbii Sərvətlər Nazirliyində açıla bilər, eləcə də onlar özəl də ola bilər. Əsas tələb onların akkreditasiyadan keçməsidir. Akkreditə edilmiş orqan kimi Ekologiya və Təbii Sərvətlər Nazirliyi çıxış edir. Nazirlik bu və ya digər laboratoriyanın standartlar üzrə sınaqlar keçirə bilməsini müəyyən edəcək.
"Bu laboratoriya özəl də ola bilər. Əsas odur ki, o, akkreditə olunsun. Laboratoriya nəticələri təqdim edir və bu nəticələr əsasında uyğunluq sertifikatı verilir", - Abdullayev qeyd edib.
İyulun 1-dən etibarən Azərbaycanda avtomobil vasitələrinin atmosferə zəhərli maddələrin tullantısı üzrə yeni standartlar tətbiq ediləcək. Bu tarixdən etibarən Avro-2 standartlarına cavab verməyən avtomobil vasitələrinin respublikaya gətirilməsinə qadağa qoyulacaq. Standartlaşdırma üzrə Dövlət Komitəsi avtomobil vasitələrinin atmosferə zəhərli maddələrin tullantısı üzrə texniki normativləri hazırlayıb və digər müvafiq dövlət strukturları ilə razılaşdırıb. Bu normativin artıq gələn həftənin sonuna təsdiqlənəcəyi planlaşdırılıb.
