Azərbaycan, Bakı, 7 iyul /Trend, müxbir N.ismayılova/
Azərbaycanda yeganə qızıl istehsalçısı olan "Anglo Asian Mining plc" şirkəti Gədəbəydəki qızıl-gümüş mədənində iyunun 30-da başa çatan rübdə 14 836 unsiya qızıl hasil edib. Bu barədə şirkətin məlumatında deyilir.
"2009-cu ilin iyulunda başlanan istehsalın ümumi həcmi 39 858 unsiyaya çatıb ki, bu da istehsal həcmini 25 min unsiya ötür. Şirkət bu rəqəmə 2010-cu il iyunun 30-da çatmaq niyyətində idi", - məlumatda qeyd olunub.
Məlumatda deyildiyinə görə, şirkətin 31 dekabr 2010-cu il tarixinə qızıl hasilatı üzrə proqnozu 53 500 unsiya təşkil edir. Şirkət rəhbərliyi ümid edir ki, istehsal artım tendensiyasını qoruyacaq.
"Anglo Asian Mining plc" şirkəti 1997-ci ilin avqustunda Azərbaycan hökuməti ilə imzalanmış müqaviləyə əsasən, Azərbaycanın cənub-qərbindəki altı yataqda - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir.
Azərbaycan hökuməti ilə Azərbaycan Beynəlxalq Mədən Əməliyyatı Şirkəti arasında 30 il müddətinə imzalanan hasilatın pay bölgüsü haqqında müqavilədə Azərbaycanın pay hissəsi 51 faiz, Böyük Britaniyanın "Anglo-Asian Mining plc" şirkətinin pay hissəsi isə 49 faizdir.
