Azərbaycan, Bakı, 13 iyul /Trend, müxbir İ.Xəlilova/
Dünya Bankı (DB) avqustda Azərbaycan hökuməti, parlamenti və vətəndaş cəmiyyəti ilə dörd ilə nəzərdə tutulan (2011-2014-cü illər) əməkdaşlığın yeni strategiyası üzrə məsləhətləşmələr (Country Partnership Strategy) aparmağa hazırlaşır. Bu barədə çərşənbə axşamı bankın Bakı nümayəndəliyindən bildiriblər.
"Bundan sonra strategiya təsdiq edilməsi üçün bankın Direktorlar Şurasına təqdim ediləcək. Bunun sentyabr-oktyabrda baş tutacağı gözlənilir", - nümayəndəlikdən deyiblər.
Strategiya çərçivəsində bank hər il ölkəyə 250 milyon dollar ayırmağı planlaşdırıb. DB ümumilikdə dörd il ərzində ölkədə layihələrin maliyyələşdirilməsinə orta hesabla bir milyard dollar ayırmaq niyyətindədir.
Bankın başlıca ideyası yol inşası və aqrosənaye inkişafı sahəsində uğurlu layihələri davam etdirməkdən ibarətdir.
Bank ekologiya, təhsil sahələrində beş yeni layihəni təsdiqləməyə hazırlaşır. Bundan başqa, kiçik şəhərlərin siyahısını genişləndirməklə su təchizatı və kanalizasiya sistemlərinin təkmilləşdirilməsi layihəsinin davamı da mümkündür.
Dünya Bankı Azərbaycan hökuməti ilə 1992-ci ildən əməkdaşlığa başladığı vaxtdan 2,7 milyard dollar məbləğində 52 layihəni maliyyələşdirib. Bu vəsaitlərdən 1,5 milyard dollardan çox istifadə olunub.
