Azərbaycan, Bakı, 27 iyul /Trend, müxbir İ.Xəlilova/
Azərbaycanın sığorta şirkəti "Alfa Sığorta" ASC Azərbaycanda "Green Card"ların realizəsi məqsədilə alman broker şirkəti ilə danışıqlar aparır ki, bu da Avropaya gedən avtonəqliyyat vasitələrinə sığorta polislərini təqdim etməyə imkan verəcək. Bu barədə "Alfa Sığorta" sığorta şirkətinin Direktorlar Şurasının sədri Xəyal Məmmədxanlı bildirib.
"Biz müqaviləni imzalamağa hazırlaşırıq və hazırda qiymətləri müzakirə edirik. Yəqin ki, biz Azərbaycanda "Green Card"ları birbaşa satacaq ilk və yeganə şirkət olacağıq", - Məmmədxanlı qeyd edib.
"Alfa Sığorta" tərəfindən "yaşıl kartlar"ın realizəsi mexanizmi ölkədəki şirkətlərin bu istiqamətdəki fəaliyyətindən fərqlənəcək. Onun sözlərinə görə, hazırda bazarda bu xidmətlər agent başlanğıclarında göstərilir.
Azərbaycan 1999-cu ildən etibarən "Green Card"ın tranzit üzvüdür. Avtonəqliyyat vasitəsinin qeydiyyata alındığı ölkədə səlahiyyətli sığortaçı tərəfindən qüvvədə olan "yaşıl kart"ın verilməsi digər dövlətin ərazisində əlavə vətəndaş məsuliyyəti sığortasından azad edir. "Green Card" sisteminə qoşulmaq üçün sığorta şirkətləri depozit fondunun formalaşdırılması və yenidən sığortalanma məsələsi ilə bağlı xərclər çəkməlidirlər.
Azərbaycanda 1999-cu ildə "Green Card"ın Milli bürosu yaradılıb.
"Alfa Sığorta" ASC-nin təsisçisi 2006-cı ilin dekabrında şirkətin səhmlərinin 100 faizini alan yerli "Texnikabank" ASC-dir.
Yarımilin yekunlarına görə, şirkətin aktivləri 5 093,07 min manat səviyyəsində formalaşıb.
Şirkətin nizamnamə kapitalı 3,1 milyon manat təşkil edir. Altı ayın yekunlarına əsasən, "Alfa Sığorta" ASC-nin balanslı gəliri 484 min manat təşkil edib.
İyunun sonuna şirkət 1156,389 min manat məbləğində sığorta haqqı yığıb, şirkətin ödənişləri isə 97,65 min manat təşkil edib. Altı ay ərzində şirkət 10 351 sığorta müqaviləsi bağlayıb.
İyulun 27-nə olan rəsmi məzənnə 0,8036 AZN/USD təşkil edir.
