Azərbaycan, Bakı, 4 avqust /Trend, müxbir Ü.İsmayılova/
Azərbaycan Qiymətləndiricilər Cəmiyyəti (AQC) sentyabrın sonu, oktyabrın əvvəlində qiymətləndiricilərin sertifikatlaşdırılması üzrə dördüncü imtahanın keçirilməsini planlaşdırıb. Bu barədə çərşənbə günü cəmiyyətin icra aparatının rəhbəri Amil İsmayılov deyib.
"Hazırda imtahana hazırlıq məqsədilə 25 nəfər hər ay qiymətləndirmə fəaliyyətinin metodologiyası üzrə kurslar keçir", - İsmayılov bildirib.
Onun sözlərinə görə, iyunda mütəxəssislər qiymətləndirməyə müqayisəli yanaşma, iyulda sərfiyyat yanaşma metodologiyası mövzusu üzrə treninq keçiblər. Avqustda isə onların qiymətləndirmənin gəlir metodologiyası mövzusu üzrə treninq keçəcəkləri gözlənilir.
Bu günədək Azərbaycanda sertifikatlaşmanın birinci və ikinci mərhələsində imtahanlardan keçən yalnız yeddi qiymətləndirici sertifikatlaşdırılıb. Qiymətləndirmə fəaliyyətinin setifikatlaşdırılması üzrə üçüncü imtahandan iştirakçıların heç biri keçməyib.
