...

AİB Azərbaycan üçün yol layihəsi çərçivəsində kreditdən istifadə müddətini 3,5 il uzadıb

Biznes və iqtisadiyyat xəbərləri Materials 10 Avqust 2010 14:29 (UTC +04:00)

Azərbaycan, Bakı, 10 avqust /Trend, müxbir İ.Xəlilova/

Asiya İnkişaf Bankı (AİB) Masallı-Astara avtomagistralının bir hissəsinin yenidən qurulması layihəsi çərçivəsində Azərbaycan tərəfindən kredit vəsaitlərindən istifadə üçün müddəti 31 dekabr 2013-cü il tarixədək uzadıb. Bu barədə çərşənbə günü bankın Bakı filialından bildiriblər. Saziş 2008-ci ilin yanvarından qüvvəyə minəndən etibarən, kredit resursları, demək olar, istifadəsiz qalıb və onlardan istifadə müddəti 30 iyun 2010-cu il tarixdə başa çatıb.

"Bununla əlaqədar Azərbaycan hökuməti kreditdən istifadə müddətinin üç il uzadılmasını xahiş edib. Bu təklif AİB tərəfindən qəbul edilib; belə ki, digər layihələr çərçivəsində normal praktika dörd və ya beş il müddəti hesab olunur", - bankın nümayəndəliyindən deyiblər.

Masallı-Astara yol sahəsi Asiya İnkişaf Bankının (AİB) 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.

Layihəyə başlamaq üçün başlıca məsələlərdən biri Masallı-Astara avtomagistralı yaxınlığında torpaq alışı planının həyata keçirilməsidir. Kredit razılaşmasının şərtlərinə əsasən, torpaq alışı ilə bağlı məsələ 2010-cu ilin iyununadək həll edilməli idi. Hökumətdən bildirildiyi kimi, bu proses praktik olaraq Masallı-Astara magistralının birinci hissəsində (21 kilomer uzunluğunda) başa çatıb ki, bu da bankın başlıca tələbi idi.

Lakin "Azəryolservis" QSC-nin podratçının müəyyən edilməsi üzrə tenderinin ləğv edilməsi ilə əlaqədar, bu hissədə tikinti işlərinə əvvəllər planlaşdırıldığı kimi, 2010-cu ilin oktyabrında başlamaq mümkün olmayacaq.

Lakin Nəqliyyat Nazirliyindən üçüncü rüb ərzində podratçının seçimi üzrə bütün məsələlərin həll olunacağını söyləsələr də, tikinti işlərinin başlanılma vaxtı bildirilməyib. "AİB-in şərtlərinə görə, podratçı yalnız torpağın alışı prosesi başa çatandan sonra elan edilə bilər və müvafiq olaraq, onun müəyyən edilməsi üzrə tender də bu rüb elan oluna bilər", - nazirlikdən bildiriblər.

Masallı-Astara avtomagistralı üç əraziyə bölünüb. Hazırda avtomagistralın birinci ərazisinin (uzunluğu 21 km) tikintisi üzrə podratçı müəyyənləşir.

Layihə AİB Direktorlar Şurasında 2007-ci il sentyabrın 28-də təsdiqlənib, bankla kreditin verilməsi sazişi isə 2009-cu il yanvarın 15-də imzalanıb. "Asiya" bankının kredit resursları bankın adi resurslarından hissə-hissə (190 milyon dollar) 24 il müddətinə dördillik güzəştlə və ildə libor+0,6 faizlə verilib. 10 milyon dollar güzəştli kredit isə 32 il müddətinə, səkkizillik güzəştli dövrlə və güzəştli dövr ərzində 1 faizlə, qalan dövrlər üzrə 1,5 faizlə verilib. Kreditin güzəştli hissəsi avtomagistrala birləşən ikinci dərəcəli kənd yollarının yenidən qurulmasına hesablanıb.

Masallı-Astara avtomobil yolunun yenidən qurulmasına kredit "Multitranche Financing Facility" (MFF) mexanizmi çərçivəsində 500 milyon dollar məbləğində təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayrılıb.

Xəbər lenti

Xəbər lenti