Azərbaycan, Bakı, 23 avqust /Trend, müxbir E.İsmayılov, N.Kirsxaliya/
Noyabrda Gürcüstanda Qara dənizin qərb sahilində ən böyük limanın tikintisinə başlanılacaq. Bu barədə Trend-ə bazar ertəsi telefonla limanın sahibi "Black Sea Product Ltd" (BSP) şirkətinin direktoru Şalva Sakadze deyib. Liman Supsada tikiləcək.
"İndi meydançanın böyük tikintiyə hazırlığı üzrə işlər görülür. Xüsusilə də qurutma işləri aparılır. Hazırlıq mərhələsinin iki aydan sonra başa çatdırılacağı planlaşdırılıb", - Sakadze qeyd edib.
Onun sözlərinə görə, ilkin olaraq limanın tikintisinə 700 milyon dollar yatırılacaq.
Hazırlıq işləri drenaj kanallarının çəkilməsini və drenaj sisteminin yaradılmasını, eləcə də süni gölün qurudulmasını nəzərdə tutur.
Bundan əvvəl Sakadzenin dediyinə görə, illik gücü 40 milyon ton olacaq limanın tikinti prosesinin başa çatdırılması 2014-cü ilə planlaşdırılıb, ilk gəmiləri liman artıq 2012-ci ilin sonunda qəbul etməyi planlaşdırıb.
Yeni liman həm neft məhsullarının, həm də sıxılmış qazın daşınmasına hesablanacaq, limandan konteyner və quru yüklər də daşınacaq. Limanın gücünün yarısı maye yüklərin, qalanı isə konteyner və quru yüklərin daşınmasına hesablanıb.
Liman TRACECA (Avropa-Qavqaz-Asiya) nəqliyyat dəhlizinin mərkəzində yerləşəcək. O, dəmiryol magistralına digər gürcü limanlarına nisbətdə daha yaxın olacaq. Supsa limanının əsas üstünlüyü suyun dərinliyindədir (18 metr). Bu ona Bosfor boğazından keçəcək istənilən gəmini qəbul etməyə imkan verəcək.
Hazırda Supsa istiqamətində Bakı-Supsa neft boru kəməri ilə Xəzərin Azərbaycan sektorundakı "Azəri-Çıraq-Günəşli" neft-qaz yataqlar blokundan hasil olunan Azərbaycan nefti nəql olunur. Burada neft yan almadan tökülməklə tankerlərə yüklənir və dünya bazarlarında satılır.
