Azərbaycan, Bakı, 7 sentyabr /Trend, müxbir İ.Xəlilova/
Azərbaycan hökumətinin 2011-2014-cü illər üçün sosial-iqtisadi konsepsiyasının ilkin proqnozlarına görə, gələcəkdə ÜDM-in artım tempi 3,7 səviyyəsində gözlənilir. Bu barədə çərşənbə axşamı ölkə hökumətindən bildirilib.
2010-cu ilin proqnozlarına görə, bazar qiymətləri üzrə ÜDM 6,8 faiz artımla 31 825,5 milyon manat təşkil edəcək. 2009-cu ildə ölkənin ÜDM-i əvvəlki illə müqayisədə 9,3 faiz artaraq cari qiymətlərdə 34,6 milyard manat təşkil edib.
Gələn il qeyri-neft sektorunda ÜDM-in artımı 7,8 faiz səviyyəsində proqnozlaşdırılır, neft ÜDM-i üzrə 1,1 faiz azalma gözlənilir. 2010-cu ildə qeyri-neft sektorunda əlavə dəyərin istehsalı 8,3 faiz artımla 11 954,6 milyon manat, neft ÜDM-i isə 4,9 faiz artımla 16 420,2 milyon manat səviyyəsində proqnozlaşdırılır.
2011-ci ildə inflyasiya beş faiz səviyyəsində gözlənilir. Ölkənin Mərkəzi Bankının hesablamalarına görə, cari ilin yekunlarına görə, istehlakçı qiymətlərinin artımı 7 faiz səviyyəsində proqnozlaşdırılır.
Gələn il milli valyutanın məzənnəsi 2010-cu ilin proqnozu - bir ABŞ dolları üçün 0,8040 manat səviyyəsində saxlanacaq. Neftin qiymətləri də bir barel üçün 60 dollar səviyyəsində dəyişməz qalıb.
Sentyabrın 7-nə olan rəsmi məzənnə 0,8036 AZN/USD təşkil edir.
