Gürcüstan, Tbilisi, 8 sentyabr /Trend, müxbir N.Kirsxaliya/
Gürcüstanın iqtisadi inkişaf naziri Vera Kobaliya Gürcüstan və Amerika biznesmenləri arasında münasibətlərin fəallaşması uğrunda çıxış edir. Kobaliya bu bəyanatı çərşənbə günü Gürcüstan-Amerika biznes-forumunun başlanmasına qədər jurnalistlərə bildirib.
Biznes-forum "Tbilisi Mariott"da keçirilir. Forumda, həmçinin, ABŞ-ın Gürcüstandakı səfiri Con Bas və ABŞ-ın Avropa-Avrasiya Məsələləri Ticarət Departamentinin müdir müavini Xuan Verde iştirak edirlər.
Forumu Gürcüstanın iqtisadi inkişaf naziri Vera Kobaliya açıb.
Kobaliya tədbirin açılışında qeyd edib ki, biznes-forumda 100-ə yaxın şirkət nümayəndəsi, o cümlədən, Gürcüstanda işləyən xarici şirkətlərin nümayəndələri iştirak edirlər. Onun sözlərinə görə, görüşün əsas məqsədi əməkdaşlığın inkişafı və investisiyaların cəlbinə yardımdır.
"Gürcüstan və Amerika biznesmenlərinin bir-biri ilə tərəfdaşlıq münasibəti saxlamaları və müştərək biznes yaratmaları çox vacibdir. Gürcüstan biznesmenləri öz məhsullarını ixraca necə çıxarmağın lazım olduğunu öyrənməlidirlər", - Kobaliya deyib.
