Azərbaycan, Bakı, 15 sentyabr /Trend, müxbir İ.Xəlilova/
Azərbaycanın Əmlak Məsələləri Dövlət Komitəsi "İnter Enerji" MMC-ni " Zeyxur" kiçik su elektrik stansiyasının səhmlərinin satışı üzrə investisiya müsabiqəsinin qalibi elan edib. Bu barədə çərşənbə günü dövlət komitəsindən bildiriblər.
İnvestisiya proqramına əsasən, MMC 18 ay ərzində su elektrik stansiyasının fəaliyyətinin bərpasına və yenidən qurulmasına 21 004 900 manat sərmayə yatırır.
Bu vəsaitlərin su elektrik stansiyasında suyun qəbul edilməsi üçün kanal qurğularının derivasiyasının, təzyiq üçün müxtəlif hidrotexniki avadanlığın və boru kəmərinin, eləcə də su elektrik stansiyasına suyu ötürən kanalların əsaslı təmirinə və bərpasına qoyulması nəzərdə tutulub. Bundan başqa, su elektrik stansiyasında suyun qəbulu üçün su turbinlərinin, elektrik avadanlığının, idarəetmə avadanlığının və qurğuların alınması nəzərdə tutulub. İnvestisiya proqramının həyat keçirilməsi nəticəsində elektrik stansiyasının gücü 12 meqavata çatacaq ki, bu da ildə 35 kilovat elektrik enerjisini istehsal etməyə və ötürməyə imkan verəcək.
Müsabiqənin şərtlərinə əsasən, şirkət dövlət büdcəsinə 200 min manat köçürülməsi, eləcə də silinmə üçün 8 min özəlləşdirmə payının verilməsi barədə öhdəlik götürüb. İnvestisiya proqramına əsasən, su elektrik stansiyasının gələcək fəaliyyəti təmin edildikdən sonra iş yerlərinin bərpası, işçilərin sosial vəziyyətinin yaxşılaşdırılması nəzərdə tutulub. İnvestisiyaların qoyulma mərhələsində müəssisədə 100-120 yeni iş yerinin açılması planlaşdırılıb.
"Zeyxur" Qusar rayonunda yerləşir və elektrik enerjisinin istehsalı və satılmasında ixtisaslaşıb. Müəssisə 1972-ci ildən fəaliyyət göstərir. Satışın qiyməti 93 863 manat təşkil edir. Stansiyanın illik gücü 8,75 meqavatdır.
Hazırda mövcud doqquz su elektrik stansiyasından yeddisinin özəlləşdirilməsi başa çatıb. İndiyədək "Şəki", "Muğan", "Quba", "Nügədi", "Qusar", "Çiçəkli" və "Balakən" su elektrik stansiyaları özəlləşdirilib. "Zeyxur" və "Çinarlı" su elektrik stansiyaları hələ ki dövlət mülkiyyətindədir.
Sentyabrın 15-nə olan rəsmi məzənnə 0,8035 AZN/USD təşkil edir.
