Azərbaycan, Bakı, 21 sentyabr /Trend/
Yanvar-avqust aylarında Azərbaycanın nəqliyyat sektorunda 129,6 milyon ton müxtəlif yüklər daşınıb ki, bu da 2009-cu ilin həmin dövründə olduğundan 2,8 faiz çoxdur. Bu barədə Azərbaycan Dövlət Statistika Komitəsi məlumat verib.
Yanvar-avqust aylarında daşınan yüklərin ümumi həcminin 74,3 faizi özəl sektorun payına düşür. Bu ilin yanvar-avqust aylarında yüklərin ümumi həcminin 51,1 faizi avtomobil nəqliyyatı ilə, 32 faizi boru kəmərləri, 11,2 faizi dəmiryol, 5,7 faizi isə dəniz nəqliyyatı ilə daşınıb.
Yanvar-avqust aylarında 889,5 milyon sərnişin daşınıb ki, bu da ötən ilin analoji dövr göstəricisindən 3,6 faiz çoxdur. Sərnişinlərin əsas hissəsi (86,3 faiz) avtomobil nəqliyyatı və metro ilə (13,3 faiz) daşınıb.
Dəmiryol nəqliyyatı ilə 14,5 milyon ton müxtəlif yüklər daşınıb ki, bu da 2009-cu ilin yanvar-avqustundan 6,8 faiz çoxdur.
Dəniz nəqliyyatı ilə 7,3 milyon ton müxtəlif yüklər daşınıb. Bu, ötən ilin yanvar-avqust ayında olduğundan 15,6 faiz azdır. Daşınan yüklərin bütün həcmi beynəlxalq əməliyyatların payına düşür. Azərbaycan limanlarında emal olunmuş yüklərin həcmi yanvar-avqustda 6,5 milyon ton təşkil edib ki, bu da ötən ilin analoji dövründəkindən 22,7 dəfə çoxdur.
Avtomobil nəqliyyatı ilə 66,3 milyon ton yük daşınıb. Bu, ötən ilin yanvar-avqust aylarındakından 6,4 faiz çoxdur. Sərnişindaşımanın həcmi 767,5 milyon nəfər (artım 7,5 faiz) təşkil edib. Sərnişinlərin 96,5 faizi avtobuslarla, 3,5 faizi minik avtomobilləri ilə daşınıb.
Metropolitenlə sərnişindaşımanın həcmi 118 milyon nəfər təşkil edərək 15,7 faiz azalıb.
Yanvar-avqust aylarında hava nəqliyyatı ilə 668,7 min sərnişin daşınıb. Daşımaların həcminin 22,3 faizi özəl sektorun payına düşüb.
Bu ilin yanvar-avqustunda Avrasiya nəqliyyat dəhlizi ilə Azərbaycan ərazisindən 29,4 milyon ton yük daşınıb ki, bu da ötən ilin analoji dövr göstəricisindən 8,6 faiz çoxdur. Yanvar-avqust aylarında dəhliz çərçivəsində 116,5 milyon nəfər daşınıb ki, bu da 2009-cu ilin yanvar-avqust aylarında olduğundan 7,9 faiz çoxdur.
