Azərbaycan, Bakı, 21 sentyabr /Trend, müxbir N.İsmayılova/
Azərbaycanın fond bazarında ötən illə müqayisədə fəallığın artması, eləcə də əməliyyatların dinamikliyi müşahidə olunmaqdadır. Bu barədə çərşənbə axşamı Azərbaycanın Qiymətli Kağızlar üzrə Dövlət Komitəsinin (QKDK) sədri Rüfət Aslanlı deyib.
"Korporativ qiymətli kağızların qiymətinin artım tempi ötən ildəkiləri 2-3 dəfə ötür, səhmlər bazarında sabitlik və ötən illə müqayisədə dinamiklik müşahidə olunmaqdadır", - Aslanlı bildirib.
Onun sözlərinə görə, bazarda əsas yeniliklər əməliyyatların və bazar infrastrukturunun təkmilləşdirilməsinə yönəlib.
2009-cu ilin ortalarında Bakı Fond Birjası və Milli Depozit Mərkəzi öz proqram təminatlarını dəyişiblər, ilkin proqram məhsulunun inteqrasiyası isə maliyyə vasitəçilərinə - broker və dilerlərə hər iki bazar iştirakçısının sistemlərindən uzaqdan elektron şəkildə istifadəni əldə etməyə imkan verib. Bu, konsepsiyanın birinci mərhələsi olub. İkinci faza Mərkəzi Bankın ödəniş sistemi və fond birjasının ticarət birjası arasında inteqrasiya edilmiş sistemin qabaqcıl modelini tətbiq etməklə interfeysin yaradılmasını nəzərdə tutur.
"İndi məlum olduğu kimi, birja ticarətinin avtomatlaşdırılması, postreydinq və klirinq sistemlərinin hesablamaları prosesi gedir. Bu günlərdə ödəniş sistemlərinin bu platforma ilə birləşdirilməsi prosesi başa çatacaq", - o deyib.
Onun sözlərinə görə, bu il ötən illə müqayisədə bazarda daha fəallıqla korporativ istiqrazlar buraxan lizinq və mikromaliyyələşmə şirkətləri seçilir.
"İndi iki yeni bazar alətinin hazırlanması aparılır və bu alətlərin tətbiqi üzrə yeni reqlament ictimaiyyətə yaxın gələcəkdə təqdim olunacaq. Onların bazarda yerləşdirilməsi məsələsi tələb və təklifdən asılıdır və ümid edirik ki, QKDK-nın apardığı maarifləndirici tədbirlər nəticəsində biz bu alətləri yerləşdirə biləcəyik", - o qeyd edib.
Aslanlının sözlərinə görə, son vaxtlar dövlət istiqrazlarının gəlirlərinin müsbət dinamikası nəticəsində bu alətlərin ticarət intensivliyi də artır.
2010-cu ilin yanvar-avqust aylarında bütün alətlər üzrə birja əqdlərinin ümumi dövriyyəsi 1,177 milyard manat təşkil edib. Korporativ qiymətli kağızlar bazarı ötən ilin analoji dövrü ilə müqayisədə 21,6 faiz artaraq 286,4 milyon manat təşkil edib. Bu, korporativ istiqrazlarla əməliyyatların həcminin 2,4 dəfə artımı ilə izah edilir, əqdlərin sayı isə 2,4 dəfə artaraq 149-a çatıb.
Dövlət qiymətli kağızlar bazarı 65 faiz azalaraq 890,47 milyon manata çatıb. Buna repo-əməliyyatların 3,4 dəfə azalması təsir göstərib, halbuki əqdlərin sayı az miqdarda (6,9 faiz) azalıb.
Sentyabrın 21-nə olan rəsmi məzənnə 0,8032 AZN/USD təşkil edir.