...

Azərbaycanda korporativ idarəetmə standartlarının hazırlanması tamamlanma mərhələsinə keçib

Biznes və iqtisadiyyat xəbərləri Materials 23 Sentyabr 2010 15:28 (UTC +04:00)

Azərbaycan, Bakı, 23 sentyabr /Trend, müxbir N.İsmayılova/

Azərbaycan İqtisadi İnkişaf Nazirliyi yanında fəaliyyət göstərən işçi qrup Beynəlxalq Maliyyə Korporasiyasının (BMK) dəstəyi ilə Azərbaycan şirkətləri üçün korporativ idarəetmə standartlarının hazırlanması üzrə işlər həyata keçirir. Bu barədə cümə axşamı BMK-nın Azərbaycanda korporativ idarəetmənin inkişafı üzrə layihəsinin (ACGP) rəhbəri Karolina Brayt bildirib.

"Yayda biz beynəlxalq və yerli ekspertlərdən çoxlu şərhlər aldıq və indi standartların yekun variantı işlənib-hazırlanır; biz onun payızda başa çatacağına ümid edirik", - Brayt deyib.

Onun sözlərinə görə, hazırda işçi qrup standartların layihəsinə əlavə və düzəlişlər edilməsi üçün alınan izahları işləyir.

Standartlar aşağıdakı prinsiplərə əsaslanacaq: bütün səhmdarlara eyni münasibət, Direktorlar Şurası və menecmentin hesabat vermək öhdəliyinə malik olması, informasiyaların açıq olması və şəffaflıq, daha doğrusu, maliyyə və digər hesabatların vaxtında və tam verilməsi, minoritar səhmdarların və başqa maraqlar qrupunun maraqlarına riayət olunmasına məsuliyyət, qanunun aliliyinə heç bir şərt olmadan riayət etmək.

Korporativ idarəetmə standartları layihəsinin işlənib-hazırlanması üçün yaradılan işçi qrupa İqtisadi İnkişaf, Ədliyyə nazirliklərinin, Mərkəzi Bankın, QKDK, Azərbaycan İnvestisiya Şirkətinin və BMK-nın nümayəndələri daxildirlər. Belə standartların qəbul edilməsi Azərbaycanda korporativ idarəetmə sisteminin təkmilləşdirilməsinə, biznesin imkanlarının genişləndirilməsinə, şirkətlərin fəaliyyətində effektivliyin artırılmasına imkan verəcək.

Əvvəlcə Azərbaycan hökuməti BMK-nın dəstəyi ilə Korporativ İdarəetmə Məcəlləsi hazırlamışdı. Lakin ötən il sənədin formatı dəyişdi və o, korporativ idarəetmə standartları adlandırıldı. Bu, sənədin terminoloji uyğunlaşdırılması, anlaşılmazlıq və dolaşıqlığın aradan qaldırılması üçün edilib.

Korporativ İdarəetmə Məcəlləsi şirkətlər üçün korporativ idarəetmə qaydaları komplekti olmalı və korporativ idarəetmə təşkilatlarının strukturunun yaxşılaşdırılmasına kömək etməli idi. Sənəd hazırkı formatda qanun kimi qəbul olunmayacaq.

Yerli şirkətlərdə korporativ idarəetmənin yaxşı təcrübəsi xarici sərmayədarların onlara marağını, eləcə də ölkənin qeyri-neft sektorunun cəlbediciliyini artırır.

Azərbaycan İnvestisiya Şirkəti BMK və USAID-ın dəstəyi ilə yerli şirkətlər üçün nəzərdə tutulan Korporativ İdarəetmə Məcəlləsi modelini də işləyib-hazırlayıb.

Xəbər lenti

Xəbər lenti