Azərbaycan, Bakı, 28 sentyabr /Trend, müxbir T.Cəfərov/
Hazırda Ənzəli limanının yükləmə və boşaltma potensialı 7 milyon ton təşkil edir. Bu barədə Trend-ə İranın Gilan əyalətinin rəhbəri Ruhullah Qəhrəmani deyib.
Onun sözlərinə görə, Ənzəli limanı İranın şimalında yerləşən ən böyük limanlardandır və hökumət bu limanın gələcək inkişafı üçün proqram hazırlayıb.
"Ümid edirəm ki, yaxın iki ildə limanın yükləmə və boşaltma potensialı 11 milyon tona çatacaq. Hazırda bu limana yardımçı infrastruktur qismində dəmiryolun tikintisi həyata keçirilir. O, 2012-ci ildə istifadəyə veriləcək. Dəmiryol layihəsinin həyata keçirilməsi ilə Ənzəli limanı İran, Orta Asiya ölkələri və Rusiya üçün ən inkişaf etmiş limanlardan birinə çevriləcək", - Qəhrəmani bildirib.
Onun sözlərinə görə, hazırda İranın Astara şəhəri yaxınlığında yeni özəl limanın tikintisinə də başlanılıb. Bu limanda da həm quru məhsulların, həm də neft-kimya məhsullarının yüklənib boşaldılması nəzərdə tutulub. Bu limanın inkişaf etdirilməsi məqsədilə burada dəmiryolun çəkilməsinə başlanılıb.
"İran Xəzər dənizində Kaspian limanı tikməkdə davam edir. Bu liman Ənzəli limanın şərqində tikilir", - Gilan əyalətinin rəhbəri qeyd edib.
Bu limanda 2 milyon ton ağırlığında gəmilərin qəbulu üçün yanalma körpüləri tikiləcək.
Onun sözlərinə görə, İran və Azərbaycan, İran və Rusiya arasında əməkdaşlığın əsas məsələsi Ənzəli-Bakı və Ənzəli-Həştərxan limanları arasında sərnişin gəmi reyslərinin açılmasıdır. İran bu layihələrin müzakirəsini Azərbaycan və Rusiya tərəfləri ilə aparır.
"Üç ölkə arasında sərnişin marşrutunun açılması turizmin inkişafına böyük töhfə verəcək. Hazırda bu istiqamətdə işlər gedir və bu marşrut bu yaxınlarda açılacaq", - Qəhrəmani deyib.
