Azərbaycan, Bakı, 1 oktyabr /Trend/
Azərbaycan Vergilər Nazirliyi yanında Vergi Cinayətlərinin İbtidai Araşdırılması Departamenti tərəfindən "AZ.SV" MMC-də külli miqdarda vergilərin dövlət büdcəsinə ödəməkdən yayındırılması faktı üzrə Cinayət Məcəlləsinin 213.2.2-ci maddəsi ilə cinayət işi başlanıb. Bu barədə cümə günü nazirlikdən verilən məlumatda deyilir.
Əvvəllər Cinayət Məcəlləsinin 213.4-cü maddəsi ilə məhkum olunmuş Əliyev Rövşən Süleyman oğlu "AZ.SV" ilə yanaşı, ayrı-ayrı şəxslərin adına təsis olunmuş daha iki şirkətin - "STS GROUP" və "World Sistem I" MMC-lərin fəaliyyətinə də faktiki rəhbərlik edərək bir qrup şəxslə cinayət əlaqəsinə girib və külli miqdarda vergiləri dövlət büdcəsindən yayındırıb.
Vergi Məcəlləsinin tələbləri pozulmaqla "STS GROUP" və "World Sistem I" MMC-lər üzrə 2009-cu il üçün mənfəət vergisinin bəyannamələrinin, "AZ.SV" MMC üzrə isə 2009-cu il üçün mənfəət vergisinin və 2010-cu ilin yanvar-fevral ayları üçün Əlavə Dəyər Vergisinin bəyannamələrinin vergi orqanına təqdim edilməməsi və dövlət büdcəsinə külli miqdarda ziyan vurulması ilə əlaqədar Əliyev Cinayət Məcəlləsinin 213.2.2-ci maddəsi ilə ittiham elan olunub, Bakı şəhəri Xətai rayon məhkəməsinin qərarı ilə barəsində həbs qətimkan tədbiri seçilib.
Məlumatda deyildiyi kimi, cinayət işi üzrə ibtidai araşdırma davam etdirilir.