Azərbaycanın valyuta bazarının həftəlik xülasəsi

Azərbaycan, Bakı, 16 oktyabr /Trend, müxbir N.İsmayılova/

Ötən həftənin yekunlarına əsasən, Azərbaycan Mərkəzi Bankı tərəfindən müəyyən olunmuş manatın ABŞ dollarına münasibətdə rəsmi məzənnəsi 0,0005 bənd (0,05 faiz) möhkəmlənib. Ötən həftə orta məzənnə 1 ABŞ dollarına 0,80176 manat səviyyəsində müəyyən edilib.

Oktyabrın 11 və 12-də manatın dollara nisbətdə maksimum məzənnəsi 1 ABŞ dollarına 0,8020 manat səviyyəsində müəyyən edilib, minimum məzənnə isə oktyabrın 14-15-də 0,8015 manat səviyyəsində olub.

Həftənin yekunları üzrə Bakı Banklararası Valyuta Birjasında keçirilən sövdələşmələr nəticəsində müəyyən edilən manatın ABŞ dollarına nisbətdə birja məzənnəsi 0,8032 manat səviyyəsində dəyişməz qalıb.

Həftə ərzində BEST-də həmin gün valyutalaşdırma ilə sövdələşmələr həyata keçirilib (T+0): oktyabrın 11-də 0,8032 AZN/USD məzənnə ilə $2 milyon, oktyabrın 12-də sövdələşmələr həyata keçirilməyib, buna görə də məzənnə əvvəlki - 0,8032 AZN/USD səviyyəsində saxlanılıb. Oktyabrın 13-də 0,8032 AZN/USD məzənnə ilə $0,1milyon, oktyabrın 14-də 0,8032 AZN/USD məzənnə ilə $2 milyon, oktyabrın 15-də sövdələşmələr həyata keçirilməyib, buna görə də məzənnə əvvəlki - 0,8032 AZN/USD səviyyəsində saxlanılıb.

USD/AZN T+1 və T+2 və alətləri üzrə tələbat olmadığından dilerlər tərəfindən sövdələşmələr həyata keçirilməyib. RUB/AZN və EUR/AZN alətləri üzrə BEST-ə banklar tərəfindən sifarişlər təqdim olunmayıb.

Özəlləşdirmə çeklərinin qiyməti ötən həftə dəyişməz qalıb - alışı 5 manat, satışı isə 6 manat təşkil edib. Azərbaycan Prezidenti İlham Əliyevin dövlət özəlləşdirmə paylarından (çeklərindən) istifadə prosesinin təmin edilməsi üzrə əlavə tədbirlər haqqında fərmanına uyğun olaraq, onların istifadə müddəti daha 1 il - 2011-ci il yanvarın 1-dək uzadılıb. Belə qərar bu gün dövriyyədən çeklərin təxminən 80 faizinin çıxarılması ilə əlaqədardır.