Azərbaycan, Bakı, 22 oktyabr /Trend, müxbir A.Axundov/
Azərbaycan Maliyyə Nazirliyi yanında Dövlət Sığorta Nəzarəti Xidməti oktyabrın 19-da "BE&G SIĞORTA ŞİRKƏTİ" QSC-nin adının dəyişərək, "Meqa Sığorta" adlandırılması ilə əlaqədar şirkətin sığorta fəaliyyəti göstərmək üçün xüsusi icazəsini yeniləyib. Bu barədə cümə axşamı DSNX-nin saytında yerləşdirilmiş məlumatında deyilir.
Bununla əlaqədar Dövlət Sığorta Nəzarəti Xidməti sığortaçıların və təkrar sığortaçıların reyestrində dəyişiklik edib.
Sığorta şirkəti 1998-ci ildə Naxçıvan şəhərində "Naxçıvan" kommersiya sığorta şirkətinin bazasında fəaliyyətə başlayıb. 1998-cı ildə şirkətin Bakı filialı açılıb və fəaliyyətə başlayıb.
2001-ci ildə şirkətin baş ofisinin Naxçıvandan Bakıya köçürülməsi və "BE&G" sığorta şirkəti kimi fəaliyyət göstərməsi haqqında qərar qəbul edilib.
Şirkət üçü icbari olmaqla, sığortanın 29 növü üzrə fəaliyyət göstərmək hüququna malikdir. Şirkətin nizamnmaə kapitalı iki milyon manatdır.
2010-cu ilin yanvar-avqust aylarında şirkət 0,29 milyon manat həcmində sığorta haqqı toplayıb, 0,21 milyon manat həcmində isə ödəniş həyata keçirib.
2009-cu ildəki fəaliyyətinin yekunları üzrə şirkətin sığorta mükafatlarının həcmi 0,95 milyon, ödənişləri 0,5 milyon manat olub.