Azərbaycan, Bakı, 12 noyabr /Trend, müxbir İ.Xəlilova/
Azərbaycan Nazirlər Kabinetinin qərarı ilə bir sıra dövlət təşkilatlarına beynəlxalq sazişlərin bağlanması səlahiyyəti verilib. Qərarın mətni cümə günü Nazirlər Kabinetinin saytında dərc olunub. "Azərbaycan Respublikasının beynəlxalq müqavilələrinin bağlanması, icrası və ləğv edilməsi qaydaları haqqında" qanunda dəyişikliklər edilməsi barədə" qanuna edilən dəyişikliklərə uyğun olaraq bu funksiyalar "Azərsu" ASC, "Azəristiliktəchizat" ASC və "Meliorasiya və Su Təsərrüfatı" ASC-yə verilib.
Qanuna edilən dəyişikliklərə əsasən, "Azərsu" su təchizatı və kanalizasiya sisteminin yaxşılaşdırılması məqsədi ilə beynəlxalq sazişlərin bağlanması üzrə danışıqlar aparmalı, onları imzalamalı və imzalanmış sazişlərin icrasını təmin etməlidir.
"Azəristilik" SC-nin sədri istilik və isti su təchizatı sisteminin yaxşılaşdırılması məqsədi ilə beynəlxalq müqavilələrin bağlanması üçün danışıqlar aparmalı, onları imzalamalı və imzalanmış müqavilələrin icrasını təmin etməlidir.
"Meliorasiya və su təsərrüfatı" ASC beynəlxalq danışıqlarda iştirak etməli, meliorasiya və su təsərrüfatı sistemlərinin yaxşılaşdırılması məqsədi ilə beynəlxalq müqavilələrin bağlanması üçün danışıqlar aparmalı, onları imzalamalı və imzalanmış müqavilələrin icrasını təmin etməlidir.
Bu qərar imzalandığı gündən - noyabrın 11-dən qüvvəyə minib.
