Azərbaycan, Bakı, 18 noyabr /Trend, müxbir N.İsmayılova/
Avropa Yenidənqurma və İnkişaf Bankı (AYİB) 2010 -cu ilin yekunları üzrə Azərbaycanda ümumi daxili məhsulun (ÜDM) dörd faizlik artımını proqnozlaşdırır. Bu barədə "Keçid iqtisadiyyatı haqqında - Bərpa və islahatlar" (Transition report 2010 "Recovery and Reform") adlı məruzədə deyilir. 2009-cu ildə ölkədə ÜDM 9,3 faiz artıb.
Bankın proqnozlarına görə, ölkədə inflyasiya ilin sonunda 2009-cu ildəki 1,5 faizə qarşı 6 faiz təşkil edəcək.
"Azərbaycan üçün başlıca vəzifə iqtisadiyyatın şaxələndirilməsidir. Dünya iqtisadi böhranı iqtisadiyyatın xammal məhsullarının qiymətlərindəki tərəddüdlərə zəifliyini göstərdi, belə ki, ticarətin şəraiti kəskin pisləşdi. Qeyri-neft ixracının artırılması üçün biznes mühitinin yaxşılaşdırılması, rəqabətin təşviqi və daha çox xarici strateji sərmayədarların cəlb edilməsi vacibdir", - hesabatda bildirilir.
Hesabatda deyildiyi kimi, ortamüddətli perspektivdə hökumət neft gəlirlərindən asılılığının azaldılması və neft sektorundan əldə olunan gəlirlərdən səmərəli istifadənin təmini üçün fiskal möhkəmləndirmə proqramını reallaşdırmalıdır.
AYİB-in proqnozlarına görə, 2010-cu ildə dövlət balansı 2009-cu ildəki 6,8 faizə qarşı ÜDM-in 14 faizini təşkil edəcək. Cari əməliyyat hesabı da 24 faizədək artacaq ki, ötən il bu göstərici ÜDM-un 23,6 faizini təşkil edirdi. Bankın proqnozlarına görə, xalis birbaşa xarici sərmayələrin həcmi 2010-cu ilin sonlarında 4504 milyon dollara çatacaq.
Beynəlxalq Valyuta Fondu 2010-cu ildə Azərbaycan üçün ÜDM-in real artım proqnozunu əvvəllər proqnozlaşdırılan 2,7 faizə qarşı 4,3 faiz artırıb. Ölkə üzrə ÜDM artım proqnozu 0,6 faizdən 1,8 faizədək, 2015-ci ilədək isə 0,7 faizdən 0,9 faizədək artırılıb.
Öz növbəsində Asiya İnkişaf bankı 2010-cu ildə Azərbaycan üçün ÜDM-un artım templərini 3,8 faiz, 2011-ci il üçün isə 3,5 faiz səviyyəsində proqnozlaşdırıb.
Azərbaycanın Dövlət Statistika Komitəsinin məlumatına görə, 2009-cu ildə ÜDM-də artım 9,3 faiz təşkil edib. 2010-cu ildə isə ölkə hökuməti 6,8 faiz səviyyəsində artım gözləyir.
