Azərbaycan, Bakı, 18 noyabr /Trend, müxbir N.İsmayılova/
2010-cu ilin yanvar-oktyabr aylarında Azərbaycanda orta aylıq əmək haqqının məbləği 320 manat təşkil edib ki, bu da ötən ilin müvafiq göstəricisindən 7,2 faiz çoxdur. Bu barədə cümə axşamı Dövlət Statistika Komitəsindən bildiriblər.
Ən yüksək əmək haqqı sənaye hasilatında, maliyyə və sığorta, informasiya və rabitə, elmi və texniki fəaliyyət sahələrində, eləcə də tikinti sektorunda işləyənlərdə qeydə alınıb.
Müəssisə və təşkilatların işçiləri 109 milyon manat məbləğində sosial təyinatlı təzminatlar alıblar. Onların əsas alıcısı sənaye hasilatı, enerji, qaz və suyun istehsalı və bölüşdürülməsi üzrə müəssisələr, maliyyə, sığorta, nəqliyyat, rabitə sahəsində fəaliyyət göstərənlər olublar.
Yanvar-oktyabrda adambaşına düşən nominal gəlir 2273,9 manat təşkil edib ki, bu da ötən ilin müvafiq göstəricisini 10,4 faiz ötür.
Adambaşına düşən real pul gəliri 11,2 faiz artımla 2068,4 manat təşkil edib.
Yanvar-oktyabrda Azərbaycan əhalisinin nominal pul gəliri 20290,2 milyon manat olub ki, bu da ötən ilin analoji göstəricisindən 11,7 faiz çoxdur. Bu dövrdə əhalinin real pul gəliri 11,2 faiz artımla 18 457,1 milyon manata çatıb.
Hesabat dövründə əhali mal və xidmətlərin əldə olunması üçün öz şəxsi gəlirlərinin 70 faizini, vergilər, digər məcbiri ödənişlər və könüllü üzvlük haqlarının ödənilməsinə 9 faizini, kapitalın toplanması və artırılmasına 19,3 faizini yönəldib.
Noyabrın 18-nə rəsmi məzənnə 0,8002 AZN/USD təşkil edir.