Azərbaycan, Bakı, 29 noyabr /Trend, müxbir A.Axundov/
"Atəşgah" sığorta şirkətinin rəhbərliyində dəyişikliklər Azərbaycan Sığortaçılar Assosiasiyasının (ASA) Müşahidə Şurasında (MŞ) dəyişikliklərə yol açmayacaq. Bu barədə bazar ertəsi ASA-nın icraçı direktoru Qafar Məcidov bildirib.
"Azər Əliyevin "Atəşgah" şirkətinin idarə heyəti sədri postundan getməsi onun iki il dalbadal seçildiyi assosiasiyanın MŞ sədri vəzifəsindən getməsi üçün səbəb ola bilməz. Bu dəfə ilk dəfə olaraq şuranın sədri iki il müddətinə seçilib", - Məcidov deyib.
Səhmdarların ümumi yığıncağının qərarı ilə 2010-cu il noyabrın 26-dan şirkətin idarə heyətinin sədri vəzifəsinə Tələt Səfərov təyin edilib. O, indiyədək " Atəşgah" SŞ-nin idarə heyəti sədrinin müavini vəzifəsini tutub.
Məcidov bildirib ki, ASA Müşahidə Şurasının hazırkı sədrinin heç bir sığorta şirkətini təmsil etməməsi assosiasiyanın məqsədlərinə tam uyğundur.
"ASA-nın məqsədi assosiasiyaya rəhbərlik edən şəxsin hansısa sığorta şirkətini təmsil etməməsindən ibarətdir", - Məcidov bildirib.
Mövcud nizamnaməyə görə, MŞ-nin hər beş üzvündən biri il ərzində növbə ilə şuraya sədrlik edir. Lakin ASA təsisçilərinin noyabrın 8-də keçirilən sonuncu ümumi iclasında MŞ sədri iki il müddətinə seçilib.
Bir müddət əvvəl Məcidovun Trend-ə dediyi kimi, ASA öz nizamnaməsində assosiasiyanın MŞ sədri vəzifəsinin növbəti rotasiya müddətinə yenidən baxa bilər.
"Biz təcrübə aparmaq qərarına gəldik. İki ildən sonra yenidən bu məsələyə baxacağıq və bazardakı vəziyyətdən və ötən iki ilin yekunlarından asılı olaraq, bu vəzifə üzrə rotasiya müddətinə yenidən baxa bilərik. Bunlar ikiillik və ya beşillik müddət ola bilər. Lakin daimi sədrin seçilməsi də mümkündür", - Məcidov deyib.
Müddətlərin dəyişdirilməsinin zəruriliyi mövcud rotasiya sisteminin uzunmüddətli layihələrin yerinə yetirilməsi üçün rahat olmamasından ibarətdir.
"Bir adamın layihələrin reallaşdırılmasına başlaması və onu başa vurması lazımdır", - Məcidov bildirib.
Onun sözlərinə görə, hazırda assosiasiya ümumi sığorta məqsədləri güdən, eləcə də təhsil bazasının yaradılması, sığortaçılar və Maliyyə Nazirliyi arasında qarşılıqlı fəaliyyət mexanizminin yaradılması və s. layihələr həyata keçirir.
2006-cı il dekabrın 29-da əsası qoyulan və 28 üzvü birləşdirən assosiasiyanın əsas məqsədi Azərbaycanda fəaliyyət göstərən sığorta şirkətlərinin, eləcə də təkrar sığorta şirkətlərinin inkişafına kömək göstərməkdən, onların soaial-iqtisadi, informasiya və digər proqramlarının inkişafı, göstərilən sahələrdə onların biliklərinin artırılmasından ibarətdir.
Azərbaycanda 27 sığorta və bir təkrar sığorta şirkəti fəaliyyət göstərir.
